Halla og Ragna blogga frá Árósum

¿Que pasa?

2008-03-21T00:56:00.003+01:00

Við mæðgur í Parc Güell með Barcelona í bakgrunni

Kannski komin tími á eitt blogg eða svo?

Erum staddar í Barcelona eins og er í páskafríi með mömmu. Borgin er alveg yndisleg eins og allir voru reyndar búnir að segja við okkur. Kom mér á óvart hvað það er fínt hérna og allar byggingarnar eru svo fallegar, kannski eftir að maður er búin að vera í Kaíró þá eru allar stórborgir fallegar hehe...

Við búum í algjörri lúxus íbúð í eigu íslendinga hérna og stutt í allt eins og Metro og svona sem munar auðvitað öllu. Við erum erum svo sem ekki búnar að gera neitt svakalega mikið síðan við komum, löbbuðum Römbluna í gær og gegnum Barrio Gótica og í dag fórum við í Parc Güell í geggjuðu veðri þar sem Gaudí safnið er. Við kíktum aðeins út í gær með Hannesi, sænskum strák sem býr hérna og leigði herbergi hjá mömmu seinasta haust í 3 mánuði. Hann er búinn að búa hérna í ansi langan tíma, það er sérstaklega gaman að fá að upplifa svona "local" stemningu en ekki bara túrista dæmið. Á dagskránni er svo að fara í Dalí þorpið, skoða gömlu kirkjunna Sagrada Familia, kíkja á salsa bar (bara fyrir mömmu annars hefði ég aldrei samþykkt þetta) og svo væri geggjað að geta fengið miða á Barcelona leikinn á sunnudaginn og ef ekki þá eru 2 stórleikir í ensku deildinni sem við hljótum að geta séð á eitthvað af þessum börum hérna.

Annars er það að frétta af okkur að við erum nýfluttar í nýja íbúð sem er alveg hliðiná háskólanum, þvílíkt næs og enginn afsökun núna að mæta ekki í tíma. Fórum í saumaklúbb seinustu helgi hjá Möttu með öllum íslensku gellunum. Það var sem sagt kokteilkvöld a la sex & the city. Tvær af stelpunum höfðu verið svo sniðugar að panta hjálpartækjakynningu sem vakti mjög svo mikla lukku á meðal okkar stelpnanna. Þetta kemur bara í staðinn fyrir Tupperware kynningar hérna fyrir nokkrum árum. Þarf nú eiginlega að skella inn myndum frá þessu kvöldi við tækifæri.

Fótboltinn er náttúrulega byrjaður á fullu aftur, undirbúningstímabilið alveg meira en hálfnað erum að vísu bara búnar að keppa einn æfingarleik og ég náði einhvern veginn að slasa mig en vonandi er það ekkert alvarlegt.

Bið bara að heilsa í bili,

besos frá Barcelona

Ragna

Yeah baby yeah

2008-02-12T21:53:00.001+01:00

Frábært partý....verð nú bara að segja. Vonum að allir hafi skemmt sér vel :)

Vorum að koma heim frá London. Fórum á föstudagsmorgun og erum búnar að brasa ýmislegt síðan. Fórum náttúrulega aðeins í búðir en kíktum líka á söngleikinn We Will Rock You, reyndum að kaupa miða á Chelsea vs. Liverpool en fengum ekki á viðráðanlegu verði en sáum samt Rafael Benitez, Reina, Pennant, Babel og einhverja fleiri (mjög tilfinningaríkt fyrir okkur systur), fórum út að borða á geggjaðan Líbanskan veitingastað og svo sáum við Arsenal vinna Blackburn í gærkvöldi. Ansi mögnuð ferð og maður verður sjálfsagt lengi að jafna sig eftir þetta. Mjög erfitt að koma sér inn hversdaginn eftir svona helgi en erum strax farnar að skipuleggja næstu ferð.

Settum inn myndir úr Austin Powers partýinu á myndasíðuna okkar svo að endilega kíkiði á þær.

Bið að heilsa í bili

Halla

p.s. til hamingju með afmælið, Regína, þann 7. febrúar. Vildum að við hefðum getað verið hjá þér :( knús og kram

úps...svolítið seint en Gleðilegt Ár!

2008-01-15T15:30:00.000+01:00

Þetta er það eina sem heldur manni gangandi þessa dagana eða allavega til klukkan 14 á fimmtudaginn því þá verð ég búin í prófum.....jibbí :) og vonandi næ ég en manni er orðið nokkuð sama...vill bara ljúka þessu af.

Blogga meira seinna
Halla

8 dagar í heimkomu :D

2007-12-12T16:43:00.000+01:00

Shit, ég þjáist af óstjórnanlegu bloggleti, hvað er það? Fullt að gerast en ég nenni bara ekki að segja frá því, hehe... ekki að ég sé að monta mig en ég lifi svo geðveikt skemmtilegu lífi, stundum öfunda ég sjálfa mig hvað ég lifi skemmtilegu lífi...:D

Allavega, þá erum við systur búnar í prófum og komnar í jólafrí. Ég tók próf í enskri hljóðfræði og hlóðkerfisfræði (phonetics & phonology) eða hvað sem þetta heitir nú á íslensku og Halla tók skriflegt próf í arabísku og komst af því að hún hefur ekki tekið skriflegt próf síðan í Verzló, hvað er það? En Halla þarf víst að fara í munnlegt próf í janúar en ekki ég þannig að ég er í fríi þangað til 1. febrúar, kannski maður ætti að fá sér einhverja vinnu þangað til?

Það var julefrokost hjá okkur fótboltastelpunum seinustu helgi. Festen var haldin hjá okkur hérna í fælles kjallaranum og eins og við mátti búast þá var þetta þvílíkt gaman, þessi hópur er náttúrulega bara algjört æði. Það var drukkinn snafs, farið í pakkaleik (margir pakkar mjög skemmtilega pakkaðir inn t.d. einn eins og ákveðinn líkamspartur á karlmönnum gerður úr tveim mandarínum og snafsflösku) og dansað fram á rauða nótt. Þegar líða tók á snafsinn þá fór að losna um málbeinið hjá stelpunum og hérna koma dæmi um setningar sem komu fram í sögum sem sagðar voru þetta kvöld "Hvor vil du have den kælling?!", "den var så stor at jeg ikke engang kunne have den i munden", "drenge vil i lege med vores bolde". Ótrúlegt hvað stelpur geta skemmt sér vel án stráka.

Vikan framundan er vinna, afmælisparty um helgina, jólagjafainnkaup og svo heimferð og það verður DeJlIgT.

Hafiði það gott í bili,

Jólakveðja Ragna og hér er mynd af okkur þríburunum í jólagír í julefrokost

2007-12-07T11:21:00.000+01:00

Svona verðum við (ég, Halla og Sigrún) þegar við komumst í jólafrí. Hafið hljóð á því það er miklu skemmtilegra :D

Blogga seinna í dag þegar ég er búin í þessu fu*ing prófi eða eftir helgi, ég lofa!

Knús, Ragna

Hó hó hó....

2007-11-20T16:31:00.000+01:00

Var að setja inn fullt af nýjum myndum svo að ef þið hafið áhuga þá getið þið kíkt á þær.

Það er búið að vera nóg að gera í þessum mánuði. Fengum heimsókn frá mömmu fyrstu helgina í nóvember og það var mjög notalegt. Tókum því bara rólega og fengum auðvitað íslenskt læri, nammi og lesefni. Maður fær bara ennþá vatn í munninn. Helgina eftir það fengum við pabba, Vigdísi og Drífu fósturmömmu í heimsókn. Það var æðislegt að hafa þau í heimsókn. Fórum út að borða á Al Meza, sem er Líbanskur staður, held ég, og ég mæli með þeim stað og það eyðileggur ekki fyrir að maður má taka með sér áfengi. Síðan eldaði pabbi hangikjöt með uppstúf og grænum baunum, nammi namm, ekkert smá jólalegt. Við gerðum nú ekki mikið annað en að hanga en kíktum aðeins í Bazar Vest og þar keypti ég mér loksins Shisha þannig að nú verður loksins hægt að bjóða upp á Shisha þegar fólk kemur í heimsókn. Takk æðislega fyrir heimsóknirnar mamma, pabbi, Drífa og Vigdís.

Síðustu helgi fórum við til Köben í lokahóf hjá íþróttaklúbbnum Stellu Löve en það var í rauninni afmælispartý hjá Valdísi og Addý. Ég, Ragna, Soffía og Steinunn klæddum okkur upp sem samhæft sundlið (syncronized swimmers). Addý og Valdís voru þeldökkir körfuboltagaurar og gjörsamlega óþekkjanlegar. Þarna var einnig að finna fótboltabullur, brimbrettagaur, karatemann, hjólreiðamann og auðvitað frumlegast af öllu..........skákmann. Þetta var ekkert smá gaman og vona að það verði jafn gaman í partýinu okkar sem verður auglýst síðar.

Annars eru bara 2 til 3 vikur eftir af þessari önn og síðan byrja prófin. Við þurfum báðar að fara í próf fyrir jól og ég þarf líka að fara í 2 próf eftir jól þannig að þetta verður eitthvað lítið jólafrí en það stoppar mann að sjálfsögðu ekki í því að fara á eins og eitt ball eða tvö. Planið er að koma heim 20. desember og vera til 7. janúar. Og ef einhver heldur að hann geti kennt mér heimspeki á þessum tíma þá er ég opin fyrir öllu :)

Bless í bili

Halla

Þriðjudagskvöld

2007-11-07T22:56:00.000+01:00

Á hverjum þriðjudagsmorgni þá vakna ég með þetta lag á heilanum:

Ég vona að þið fáið þetta líka á heilann :)
Halla

Hygge og meiri hygge

2007-10-26T15:55:00.000+02:00

Ég elska “hygge”. Ég fæ aldrei leið á því að “hygge sig”. Þá meina ég t.d. fara á kaffihús, spjalla við vinkonurnar og jafnvel fá sér eins og eitt rauðvínsglas og þess háttar hlutir. Eitt sem ég myndi líka telja sem “hygge” er að fara í ljós. Það er fátt notalegra en að leggjast í hlýjan bekkinn svona þegar er farið að kólna. Ég sakna reyndar 20 mínútna bekkjanna. Núna eru þetta bara einhverjir 7-8 mínútna turbo bekkir sem maður nær ekki einu sinni að sofna í því tíminn líður svo hratt og ef maður gerist svo gráðugur að bæta við 2 mínútum þá skaðbrennur maður og situr uppi með “plumber” brókafar. Hrikalega flott.

Annað sem ég uppgötvaði fyrir nokkrum árum er að fara í nudd. En fyrir fátækan námsmann er það kannski ekki lúxus sem maður getur leyft sér, þó maður leyfi sér nú ýmislegt. En þar sem ég, eins og svo margir, er oft með vöðvabólgu þá þarf maður stundum að láta nudda þetta úr sér. Í mínu tilfelli þá veldur þetta stöðugum höfuðverk svo að ég fór nokkurra vikna meðhöndlun til sjúkraþjálfara fyrir nokkrum árum til að laga þetta. Svo lenti ég í því fyrir ca. tveimur vikum að nánast læsa á mér hnakkanum eða hálsinum svo að ég ákvað að nú þyrfti ég aftur á þessum yndislegu nuddtímum að halda. Ég var búin að sjá fyrir mér heitan bakstur um hálsinn á mér, ég vafinn inn í teppi og svo létt og notalegt nudd í ca. hálftíma, bara svona eins og þetta var. Síðan mæti ég þarna og gaurinn spyr mig spjörunum úr, t.d. hvað ég haldi að valdi þessu o.s.frv. Þegar hann frétti að ég væri að læra Arabísku þá var hann viss um að það væri að valda höfuðverknum en við ákváðum nú að það væri kannski ekki aðalorsökin, á samt örugglega einhvern þátt í þessu. Svo fer hann að tala um hvað við getum gert og hann nefnir nudd og svo eitthvað annað sem ég skyldi ekki alveg en það ætti að virka hraðar og það var eitthvað með að setja eitthvað inn í svæðin sem eru aum og svo spurði hann hvort ég myndi “þora því” eða hvað mér finndist um það því sumum finndist það ekki þægilegt. Ég vissi náttúrulega ekki alveg hvað hann var að tala um en var búin að ímynda mér alls kyns tæki og tól en í staðin fyrir að segja að ég skyldi hann ekki alveg þá sagði ég bara voða “töff” að ég væri alveg til í að prófa. Síðan fer hann eitthvað fram að ná í þetta og á meðan sit ég á bekknum og svitna því ég vissi ekki almennilega hvað ég væri komin út í. Svo kemur hann til baka með eitthvað gult box og þá voru þetta bara nálar sem hann stakk í mig og það tók svona 5 sekúndur og svo átti ég að leggjast í 10 mínútur á eftir því að mér gæti svimað. Og ég fékk ekki einu sinni teppi til að liggja með í þessar 10 mínútur. Var ekkert smá “skúffuð”. Var búin að búa mig undir 30 mínútna þægindi, gegn lágu gjaldi, en í staðinn fæ ég bara nálastungur. Það verður spennandi að sjá hvort þetta virkar. Sakna samt nuddsins:(

Jæja, verð að drífa mig því við stöllur erum að fara út að borða á Bones.
Vonandi eigið þið góða helgi og “hyg jer” og ég mæli með að þið horfið á kamelåså því þetta er sjúklega fyndið.

P.s. Til hamingju með afmælið í gær, Sigrún mín

Halla

Kamelåså!!

2007-10-22T21:52:00.000+02:00

Þetta er svo viðbjóðslega fyndið. Ég, Halla og Sigrún erum búnar að grenja úr hlátri yfir þessu. Tékkið á þessu

Kv. Ragna

Fréttaskot

2007-10-03T23:13:00.000+02:00

Það er svolítið merkilegt hvað Mið-Austurlönd eða Arabar voru hér á árum áður langt á undan Evrópuþjóðum hvað varðar hernað, efnahag, listir og vísindi en eitthvað gerðist sem olli því Vestrænar þjóðir náðu að vinna stríð eftir stríð og unnu lönd sín tilbaka og fóru að komast langt fram úr í viðskiptum og vísindum.

Ástæðan fyrir því að ég er að velta þessu fyrir mér er sú að ég er að lesa bók eftir Bernard Lewis sem heitir ´What Went Wrong?' sem fjallar um viðbrögð Mið-Austurlanda við þessum breytingum og hvernig þeir skildu Evrópskan vopnabúnað, iðnað, ríkistjórnir, menntun og menningu. Þetta var mjög skemmtileg lesning því að munurinn á þessum tveimur heimum er svo mikill og maður fær meiri skilning eftir svona lestur. Höfundur bókarinnar er prófessor í Princeton Háskóla og hefur skrifað margar bækur um sögu Araba, Islam og margt fleira tengt þessu. Það vill nefnilega svo skemmtilega til, fyrir Lewis, að hann skrifar bókina fyrir 11. september og hann hefur sko eflaust nýtt sér það í markaðsetningu bókarinnar þ.e.a.s. að hann vissi að það væri eitthvað að. En þessi lesning var nú reyndar skyldulesning þar sem ég á að skrifa ritgerð út frá bókinni þar sem ég þarf að gera grein fyrir hugtakinu "Westernization" og menningarlegri þróun Mið-Austurlanda og Vesturlanda. Ég verð að segja að mér finnst þetta mjög spennandi og er fegin að hafa fengið þetta ritgerðarefni en ekki t.d. aðskilnað ríkis og kirkju sem var hrikalega leiðinlegur kafli.

Þetta var nú bara smá "hugmynd" af því sem maður er að gera í skólanum þessa dagana. Annars unnum við okkar fyrsta leik síðasta miðvikudag. Vorum nefnilega að byrja með nýtt ellefu manna lið þar sem við erum svo margar og þurftum því nánast alveg að byrja frá grunni þ.e.a.s. í nýrri seríu og með lið sem hefur ekki æft saman áður. Þannig að þetta var búið að vera skrautlegt fram að þessu en liðið sem að við unnum er í öðru sæti í seríunni þannig að við ættum að vera í ágætis málum. Ragna skoraði fyrsta markið en það var ansi flott og ég hef heyrt fólk tala um mark ársins :) Frábært hjá henni. Annað markið kom úr hornsendingu frá mér en Ann T. náði að setja hausinn í boltann sem endaði svo með sjálfsmarki. Svo að við systur áttum alveg okkar þátt í þessum sigri :) og auðvitað Sigrún líka sem stóð eins og klettur í markinu og varði hvert skotið á fætur öðru og var meira segja farin að fórna sér ansi mikið undir lokin en hún fékk rosa dúndru í andlitið og kom þ.a.l. í veg fyrir mark. Meiri naglinn.

Á dagskránni eru svo tónleikar með Pétri Ben í Voxhall á laugardaginn og svo er alveg að koma haustfrí.......jibbí.

Hafiði það gott, gæskurnar

Halla

Heyr heyr!

2007-09-24T21:51:00.000+02:00

Mér finnst frábært framtak hjá þessum krökkum af erlendum uppruna að halda þetta málþing http://www.mbl.is/mm/frettir/frett.html?nid=1293123 þetta er einmitt sem vantar í umræðuna á Íslandi, útskýringar á því hvernig er að aðlagast nýrri menningu, nýju samfélagi og þurfa að læra nýtt tungumál, það er sko meira en að segja það! Það vita allir sem hafa prófað það og að þora að standa fyrir framan fólk og tala á tungumáli sem þú kannt ekki 100% er bara virkilega erfitt og þarf mikið hugrekki til, manni líður alltaf svolítið "handicapped" þegar maður hefur ekki alveg tök á tungumálinu líka kannski af því að fólk er svo misjafnlega skilningsríkt.
Við höfum alveg gott af því að heyra meira um þetta því ég held að við séum ennþá svo miklir nýgræðingar í þessu en vonandi batnar það með frekar umræðu og fræðslu.

Annars er bara gott að frétta héðan úr Århus, veðrið er bara búið að vera frekar gott.
Það var "opstartsfest" hjá fótboltastelpunum á föstudaginn, alltaf ástæða til að halda partý. Á laugardaginn kíktum við á leik AGF-FC Nordsjælland, því miður töpuðu okkar menn en það var samt mjög gaman að fara á völlinn, alltaf stemning að fara á fótboltaleik. Mæli líka með því fyrir einhleypar stelpur að kíkja á völlinn, þarna eru karlmenn í meirihluta og ágætis kjötsýning ef ykkur finnst leikurinn ekki spennandi ;)
Um kvöldið kíktum við í innflutningspartý til Evu sem var að flytja niðrí bæ ásamt danskri stelpu, það var þvílíkt stuð. Það var farið í twister og limbó en þar sem maður er nú í fótbolta þá eru þetta ekki beint uppáhalds leikirnir mínir þannig að ég fylgdist bara spennt með dönsurunum og fimleikafólkinu :) Halla og ég fórum snemma heim þar sem við vorum að keppa daginn eftir.

Ætla að halda áfram við að læra eða lesa celebrity slúður á netinu,

bið að heilsa,

Ragna

p.s. Til hamingju með daginn í gær pabbi minn

Ramadan Karim

2007-09-19T15:40:00.000+02:00

Ramadan, fastan, er sem sé byrjuð aftur. Þar sem múslimar eru í minni hluta hérna þá er þetta aðeins öðruvísi en við upplifðum í Egyptalandi þar sem það voru aðallega útlendingar sem föstuðu ekki og samfélagið tók virkan þátt í þessu öllu saman. Mér fannst nú helvíti hart þegar bekkurinn ákvað að hafa kökudag svona fyrstu vikuna í Ramadan. Hvað er samt málið með kökudagana? Greyið þeir sem eru að fasta þurftu að horfa á alla hina troða í sig. Það eru nú samt ekki allir múslimar sem fasta. Kennarinn minn, Omar frá Írak, er að fasta í fyrsta skipti og hann ætlar bara að fasta föstudaga, laugardaga og sunnudaga þar sem hann segist ekki getað stundað vinnu annars. Hann segist ætla að fasta til að grennast. Veit ekki hvort hann var að djóka eða ekki en það segja flestir að það virki ekki. Það kom mér svolítið að óvart þegar hann sagðist sjá um eldamennskuna á sínu heimili. Ég hef ákveðið að fasta til tíu alla daga. Það er mitt framtak í Ramadan mánuði.

Annars er það að frétta að ég er farin að vinna á kaffihúsi í Storcenter Nord svona aðeins með skólanum. Það heitir Café 5. maj svo að endilega kíkið í kaffi. Ég verð þarna á morgun og föstudaginn ;) Svo er bara brjálað að gera í skólanum, boltanum og félagslífinu. Erum að keppa tvo leiki í þessari viku, einn á eftir og einn á sunnudaginn. Væri nú gaman að skora eins og eitt mark eða svo og kannski vinna leik.

Verð að ´smutte´

Halla

Og så er vi hjem igen!

2007-09-07T12:09:00.000+02:00

Æ hvað það er nú gott að vera komin heim til sín. Ekki að það hafi ekki verið æðislegt að vera á Íslandi og þá sérstaklega Djúpavogi heldur er bara svo þægilegt að vera hjá sínu dóti og svona... æi þið vitið hvað ég meina.

Ég er loksins búin að fá einkunnina mína fyrir BA ritgerðina og var bara mjög sátt með hana, fór fram úr björtustu vonum.
Skólinn byrjaði á mánudaginn og ég er semsagt að taka ensku sem sidefag sem tekur 2 annir og þá verð ég loksins búin með þetta BA nám. Ég er í hljóðfræði, formfræði, setningarfræði, enskum bókmenntum fleira spennandi. Við erum t.d. að lesa Shakespeare og fleiri skemmtilega höfunda. Allt námið fer fram á ensku allavega kennslan og það er ágætis tilbreyting en samt er ég svolítið rugluð núna þegar ég er vön að tala dönsku og hafa kennsluna á dönsku en það hlýtur að koma.
Halla er líka byrjuð í arabískunni á fullu og er náttúrulega með sömu kennara og ég, greyin, þeir hljóta að ruglast stundum.

Sigrún vinkona er flutt til Århus og við erum svoleiðis búnar að kæfa hana síðan hún kom hehe...
Hún er að taka kandidat í lögfræði og ég held að hún spjari sig bara ótrúlega vel hérna. Hún kom líka með okkur á fótboltaæfingu í vikunni og erum við allar að fara að keppa seinna í dag, það verður spennandi að sjá hvernig þolið er eftir sumarið.

Annars er ég búin að fá vinnu hérna sem þjónn þar sem ég er ekki í fullu námi þessa önn. Þetta er í gegnum vikar fyrirtæki sem eru með kúnna eins og Scandic hótelið, Helnan Marselis hótelið og fleiri flotta kúnna. Þetta er allt mjög þægilegt í sambandi við vaktir og svona. Það er bara hringt og spurt hvort maður geti unnið ákveðna daga og maður segir bara nei ef maður getur það ekki og þarf ekkert að spá í að redda einhverjum fyrir sig eða neitt svoleiðis þeir sjá bara um það.

Festugen lýkur svo um helgina þannig að eitthvað verður kíkt í bæinn í kvöld og á morgun. Við fórum á tónleika á Musikcaféen í gær. Það voru 3 hljómsveitir að spila og ein sem heitir Münich sem var alveg hrikalega flott, þau eiga pottþétt eftir að gera það gott.

En... þangað til næst, eigið góða helgi og áfram Ísland (og Danmörk)!!

Ragna

Senn líður að heimferð

2007-08-28T14:28:00.000+02:00

Erum staddar í Reykjavík núna og erum á leiðinni aftur til Árósa næsta laugardag. Fórum frá Djúpavogi á laugardaginn og það var svolítið erfitt að kveðja. Ætlum að nýta þessa viku í alls konar stúss og auðvitað knúsa fjölskyldu og vini. Skólinn byrjar svo á fullu á mánudaginn. Ég er þá að byrja á annarri önn af sjö í arabískunni. Ragna er að taka síðustu einingarnar sínar og hún er að fara í ensku á þessari önn og þarf sennilega að taka eitthvað á næstu önn líka.

Sumarið er búið að vera yndislegt. Vorum meira og minna í vinnunni enda fengum við útrás fyrir djammsvelti sumarsins á laugardaginn en þá fórum við í innflutningspartý til Njalla og Skúla. Þetta var nú eins og Kongó reunion því það voru svo margir Kongóbúar þarna. Ekkert smá gaman að hitta þá áður en maður fer út aftur.

Valdís var að setja inn myndir frá Hróarskeldu. Getið skoðað þær hér : http://valdis.myphotoalbum.com/ . Þvílíkt gaman að skoða þetta. Var svo hrikalega gaman hjá okkur.

Þangað til næst

Halla

Myndir frá sumrinu

2007-08-17T15:50:00.001+02:00

Það er ýmislegt gert sér til dægrastyttingar hérna og ég er búin að setja inn fullt af myndum m.a. frá L.u.n.g.a. , Todmobile balli á Neskaupsstað, rúntinum og fleira sprell.
Til þess að skoða myndir getiði farið inn á Myndasíðan okkar hér til hliðar og Myndir 2007.

Góða helgi og áfram Neisti

Halla

Halló Við Voginn

2007-08-04T21:03:00.000+02:00

Gestir útihátíðarinnar Halló Við Voginn geta ekki kvartað yfir veðrinu en það hefur leikið við útihátíðargesti sem eru aðallega af erlendu bergi brotnu en þó einhverjir núverandi og fyrrverandi Kongóbúar þar á meðal og hafa þeir gætt sér á dýrindis fiskisúpu, hamborgurum, pylsum, samlokum að ógleymdri súkkulaðikökunni.

Maður verður bara að gera gott úr þessu fyrst maður er ekki að fara neitt. Fékk þvílíkan fiðring áðan þegar ég sá myndir frá Þjóðhátíð. Huggaði mig við það að veðrið yrði hvort sem er ömurlegt og maður væri búinn með rigningartjaldferðalagspakkann þetta sumarið en nei það var náttúrulega geggjað veður í Eyjum svo að það er spurning hvort maður drekkji ekki bara sorgum sínum í kvöld. En við ætlum bara að skella okkur á Todmobile á morgun svo það þýðir ekkert að væla.

Læt fylgja tvær myndir af fegurðinni hérna

Bjútifúl....bjútifúl

Setning helgarinnar: What´s the story drunken whore-y?

Halla

Ég er ekki að skilja þetta...

2007-07-28T03:32:00.000+02:00

....hvernig er hægt að koma í búðina, kaupa tvo hluti og labba út með afgang án þess að hafa borgað krónu?

Jahh..... maður spyr sig!!!!

Góða helgi, Halla

Áfram Neisti

DRULLUgaman

2007-07-12T22:36:00.000+02:00

Já það var sko DRULLUgaman á Keldunni. Þrátt fyrir smá bleytu og drullu þá var hópurinn svo jákvæður og hress að það var ekki annað hægt en að vera í stuði allan tímann og að sjálfsögðu vorum við með einkahúmorinn á hreinu: Íkingút og sjakkalahahh!
Sunnudagurinn var samt bestur og Muse fær 5 drullukökur af 5 mögulegum.
Ég, Valdís og Halla létum okkur hafa það að vera þarna frá miðvikudeginum og fram á sunnudag enda fengum við að kaupa svo frábært tjald af Gummó að það bjargaði svoleiðis lífi okkar þarna. Skítastuðullinn hjá okkur hækkaði svo mikið að okkur var alveg sama um smá drullu og skít svo framarlega sem svefntjaldi okkar var þurrt og hreint og eyrnatapparnir virkuðu :)

Annars er það að frétta að við systur erum komnar á Djúpavog í sveitasæluna og verðum að vinna í Við Voginn til enda ágúst mánaðar.
Júní mánuður hjá okkur fór bara í próf og ritgerðarskrif. Ég skilaði BA ritgerðinni minni 15. júní og fjallaði hún um konur í Egyptalandi og takmarkanir á vinnumarkaðnum hvort þær væru efnahagslegar, trúarlegar eða út af hefðum. Því miður hef ég ekki fengið að vita neitt hvernig gekk en ég vona náttúrulega bara það besta. Ég var með svo æðislega vejleder, sú sem kenndi mér á fyrsta ári, án hennar hefði ég aldrei getað þetta.
Veðrið í júní var þvílíkt gott en ég gat reyndar ekkert notið þess og það passaði alveg að þegar ég var búin í seinasta prófinu þá byrjaði að rigna, dæmigert.
Nú er ég sem sagt búin með allt sem tengist arabískunni í BA náminu og í haust byrja ég í ensku sem "sidefag". Ég þarf að taka 1 og hálfa önn eða 45 ECTS þar sem ég þurfti að fresta 15 ECTS þegar ég fór til Caíró þá klára ég á næsta ári en það skiptir engu máli það er bara hálfri önn á eftir áætlun. Ég er sem sagt að sjá fyrir endanum á þessu og minn hópur verður sá fyrsti sem útskrifast af nýju arabísku námslínunni í Århus Universitet, jubii!!

Hef ekki meir að segja í bili, vona að Valdís fari að setja inn myndir af Keldunni svo hægt sé að sjá hvernig stemmarinn var, takk fyrir geggjaða Keldu saman, þið vitið hverjir þið eruð :)

Kveðja, Ragna

2007-06-08T21:16:00.000+02:00

I'm walking on sunshine , wooah

I'm walking on sunshine, woooah

and don't it feel good!!

Hey , alright now

and dont it feel good!!

hey yeh

Rosalega er erfitt að sitja inni í svona hita. Ég og Ragna erum báðar að skrifa eða reyna að skrifa ritgerðir og íbúðin er eins og gufubað þannig að líklega verðum við að breyta læritaktíkinni yfir í það að skrifa á kvöldin og nóttinni í staðinn.

Ég skilaði einni ritgerð sl. mánudag um Ottómana tímabilið... afar spennandi. Ég get sent fólki eintak ef þess er óskað. Þetta var þriggja daga heimaverkefni sem fór fram síðustu helgi en það átti sér stað óvænt og óvelkomin truflun á laugardagsnóttinni en þá birtist RISA kónguló á gardínunni í herberginu mínu og þar sem við meikuðum ekki að díla við kvikindið þessa nótt þá flutti ég mig yfir í Rögnu herbergi og reyndi að sofa þar en gekk illa. Fundum svo kvikindið daginn eftir inní Rögnu herbergi þar sem hún hafði mjög líklega sofið við hliðiná okkur allan þennan tíma. Já, maður er hvergi óhultur. En við týndum henni aftur en hún fannst síðan á sunnudagsnóttinni en þá vaknaði Ragna upp við vondan draum og viti menn hún var mætt aftur. Þá varð gerð áætlun um að drepa hana sem heppnaðist vel og hún varð undir einu stykki Webster orðabók. Ég vona bara að hinar kóngulærnar frétti af dauðdaga hennar og láti ekki sjá sig í þessari íbúð og helst ekki nálægt henni. En boðskapur sögunnar er augljóslega sá að maður á ekki að vera heima á laugardagskvöldi.

Nú er bara að spýta í lófana og skrifa þangað til 15. júní en þá skilum við báðar og síðan fer ég í munnlegt próf í arabískunni milli 20. - 22. júní OG SVO er komið sumarfrí.......puha!!

Btw. var að setja inn myndir frá maí og það sem af er komið júní.

Hafiði það, Silja og Maren :)

Get ekki skrifað meir því grillmaturinn bíður................namm namm

Bless í bili

Halla

2007-05-29T12:21:00.000+02:00

Ég auglýsi eftir sjálfsaga og einbeitingu, endilega látið mig vita ef þið vitið hvar svoleiðis fæst.

Eins og alltaf þá er ég búin að bíða með allt fram á seinustu stundu, er rosalega góð í því, þannig að þessi mánuður fram að 20. júní verður algjört helvíti í BA-skrifum og að læra fyrir skriflega og munnlega prófið í arabísku. En eftir það verður líka bara gaman! Bara rétt rúmlega mánuður í Roskilde Festival og svo heim á Djúpavog!

Það sem við systur erum annars búnar að vera að bauka upp á síðkastið (allavega allt annað en það sem við eigum að vera að gera). Við kíktum til Cambridge í heimsókn til Regínu og Bjössa. Það var rosalega gaman. Cambridge er alveg frábær staður og þvílík saga þarna. Við fórum í punting (sigla á bát eftir á, svoldið eins og gondólarnir í Feneyjum), fórum út að borða á Alsýrskan veitingastað og töluðum og töluðum og töluðum er ekki frá því að við þrjár systurnar höfum verið með harðsperrur í kjálkunum eftir þessa helgi.

Valdís kíkti í heimsókn til Árósa helgina 17.-20. maí. Hún og Soffía kepptu með okkur og nokkrum öðrum íslenskum stelpum í Hasle Cup sem er árlegt 7 manna fótboltamót hérna. Okkur til mikillar furðu voru þvílíkt góð kvennalið með í þetta skiptið. 2 lið voru t.d. með stelpum sem hafa verið að spila með U16 og U18 hérna í DK. Þetta átti nú bara að vera svona afslappað og gaman og að drekka bjór og svona en við skemmtum okkur alveg ágætlega þrátt fyrir engan sigur og nokkur jafntefli. Toppur helgarinnar var samt án efa arkítektarpartýið þar sem það fór ekki fram hjá neinum þegar Íslendingarnir mættu á staðinn með tilheyrandi látum :) Við erum æðisleg, okkur finnst það allavega.

Svo voru úrslitin í Meistaradeildinni og fórum við nokkrar úr fótboltanum saman ásamt Steinunni og horfðum á leikinn á írskum pöbb niðrí bæ. Því miður gekk okkar mönnum ekki nógu vel en við létum það ekkert á okkur fá.
Við fórum líka á FusionFest sem voru tónleikar í háskólagarðinum allan daginn þar sem m.a. Nephew og Nik & Jay voru að spila og allavega 10 þúsund manns mættu. Það var þvílík stemning og smá upphitun fyrir Kelduna.
Á laugardaginn var kveðjupartý fyrir Steinunni og Beggu. Steinunn er að flytja til Köben og Begga er að fara heim í sumar. Það verður erfitt að sjá eftir Steinunni þar sem hún er dyggur djammfélagi með meiru en vona að hún hafi það gott í Köben og við komum að sjálfsögðu í heimsókn til hennar.

Verð að halda áfram að læra, Halla var að setja inn myndir þannig að endilega kíkjið á Myndasíðuna okkar undir 2007.
Sjáumst í Við Voginn í sumar :)

Ragna kveður í bili

Do You Know the Way to San José..tra..la..la..la..la

2007-05-02T22:15:00.000+02:00

Maður hálfskammast sín fyrir þetta æðislega veður sem er búið að vera hér síðustu daga. Ef síðustu vikur apríl mánaðar voru svona þá get ég ekki beðið eftir maí mánuði... Af því tilefni var náttúrulega splæst í sumarkjól eða kjólum þrátt fyrir bága fjárhagsstöðu en maður á nú alveg skilið smá sumargjöf og öll svörtu fötin mín eru bara ekki að gera sig í svona hita.

Ég og Ragna skelltum okkur á tónleika með Midlake síðasta laugardag í Voxhall. Þeir brugðust ekki vonum okkar og voru dúndurgóðir. Ég var bara mest hissa á því hvað það voru fáir en mjög notalegt að þurfa ekki að vera í einhverjum troðningi.

Á sunnudaginn kepptum við leik á móti ASA. Þetta lið var með jafn mörg stig og við fyrir leikinn svo að við máttum búast við jöfnum leik. Sem betur fer höfðum við betur eða unnum 2-0 þannig að við erum núna efstar í okkar seríu.

Á morgun er hinn árlegi kapsejlads eða kappróður milli háskóladeilda í Árósum. Þá mæta örugglega um tíu þúsund manns í háskólagarðinn og drekka bjór og hafa gaman. Það eru alls konar uppákomur og ég er mjög spennt fyrir þessu þar sem þetta er í fyrsta skipti sem ég fer. Stuðið byrjar klukkan tólf um hádegi og stendur fram á nótt.

Á föstudaginn ætlum við Ragna svo að fara til Cambridge og heimsækja Regínu og Bjössa enda ekki langt þangað til þau flytja heim svo að það er ekki seinna vænna en að skella sér til þeirra. Við hlökkum mikið til að sjá ykkur :)

En annars óska ég ykkur öllum góðrar helgar

Halla

Blogg jibbí!!

2007-04-20T15:05:00.000+02:00

Jújú, ég er á lífi! Bara búin að vera svoldið "busy" síðan ég kom heim úr páskafríinu.

Við vorum sem sagt á Íslandi um páskana sem var bara mjög fínt. Gátum því miður ekkert kíkt austur en gerum það bara næst. Náðum samt að hitta sem flesta sem var náttrúlega æðislegt. Kíktum í afmæli til Tinnu og þar hittist gamli góði stelpuhópurinn frá Congó og það var sko talað og talað og talað og greyið Tinna var held ég orðin svoldið þreytt þarna í lokin :)
Hittum líka Ölfu, Dröfn og Írisi sem var algjört æði því við gátum ekki farið til þeirra.
Svo var matarboð hjá mömmu og hennar fjölskylda mætti galvösk eins og vanalega. Svo fórum við í fermingu á Skírdag og uppá Keili og í Bláa Lónið með pabba á föstudaginn langa sem var alveg þvílíkt frískandi eftir allt átið um páskana.
Punkturinn yfir i-ið voru svo tónleikarnir með Björk og Hot Chip annan í páskum sem er voru alveg geðveikir, Hot Chip alveg að meika það, alveg pottþétt að fara aftur á tónleika með þeim.
Komum út aftur 10. apríl og dagarnir á eftir voru þvílíkt ljúfir 20 stiga hiti og sól ekki slæmt. Ég þurfti að fara í eitt munnlegt próf í arabísku á fimmtudeginum eftir páska sem átti að hafa verið í janúar en það klúðraðist eitthvað þannig að við þrjár í bekknum mínum sem vorum í Kaíró á seinustu önn þurftum að taka prófið núna. Það gekk bara ágætlega og er fínt að vera búin með það.

Nú er ég bara að lesa og skrifa BA ritgerðina sem á að skila 10. júní. Ég ætla að skrifa um konur í Kaíró og viðhorf þeirra til vinnumarkaðarins, athuga hversu stór hluti af vinnandi fólki eru konur og hvað geri það að verkum að þær vinni/vinni ekki er það af trúarlegum sökum eða er það samfélagið. Kemur í ljós :)

Deildin hjá okkur í fótboltanum er byrjuð á fullu, engir æfingarleikir núna bara alvaran. Var að keppa seinasta sunnudag og við unnum 1-2 sem var frábært og svo er leikur á eftir kl. 18.
Á morgun er svo forårsfest hjá félaginu. Það hafa um 70 manns skráð sig og þar af erum við stelpurnar 17 talsins þannig að afgangurinn er strákar, ekki svo slæmt ;)
Förum í fyrirpartý hjá fyrirliðanum okkar og kærustunni hennar sem búa bara rétt hjá þar sem festen er haldin og ég og Halla ætlum að bjóða uppá Opal og Tópas skot. Þetta verður örugglega þvílíkt stuð, Halla segir ykkur kannski frá þessu í næsta bloggi.

Ætla að halda áfram að lesa,

góða helgi

Ragna

Kokteilkvöld og nærbuxnamál

2007-03-21T22:14:00.000+01:00

Ég er alveg búin að fá mig fullsadda á honum Ryan í O.C. Það er alveg merkilegt hvað hann getur átt bágt. Hann var nánast heimilislaus og bjó í "gettóinu" Chino og nú býr hann í mega villu og keyrir um á Range Rover en samt er hann ennþá bitur. Þvílíkt vanþakklæti. Ég er hætt að fylgjast með þessu. Maður verður bara pirraður að horfa upp á svona :)

Annars er það í fréttum að ég og Ragna komum heim á klakann um páskana nánar tiltekið eftir 8 daga. Það stóð nú ekki til en breyttist skyndilega og við erum bara mjög sáttar við það.

Undanfarið hef ég verið að þýða grein fyrir fornleifatímarit heima og aldrei hefði mig grunað hvað ég hef lært mikið af þessu. T.d. er ég búin að læra hvaðan orðið berserkur er upprunið og hvað mjöður VIRKILEGA er. Síðan var mjög skemmtilegur (og tvíræður) kafli um birni eða lýsing á þeim. Ég gat náttúrulega ekki setið á mér og sendi Birni mági mínum kaflann en hann hljóðaði einhvern veginn svona:
Björninn er ilfeti og skilur þar með eftir sig fótafar frá hæli til táa og hann sveiflar örmunum eins og mennirnir þegar hann gengur. Höfuð hans er hringlaga eins og hjá mönnunum, hann getur hallað bakinu að tréi þegar hann situr, hann elskar hunang, hann gefur ungum sínum á brjóst og grátur þeirra hljómar eins og barnsgrátur. Hann hefur vald á miklum orðaforða og hefur vel þróaða tilfinninganæma hegðun. Björninn virðist með öðrum orðum hálf mennskur.

Fyrir þá sem hafa fylgst með nærbuxnamálunum þá fórum við systur í bæjarferð í dag þar sem við keyptum mini ofn, blandara og Ragna keypti sér nærbuxur. Þannig að nú getum við hætt að steikja allan mat, enda komnar með ógeð af því, miðvikudagskvöld eru orðin kokteilkvöld hérna á Herredsvej og Ragna þarf ekki að óttast að lenda aftur í svipuðu atviki og í síðustu viku (ég þarf náttúrulega ekkert að spá í þessu enda nærbuxnasafn mitt óaðfinnanlegt).

En þangað til næst, knús og kossar

Halla

Súr gúrka?

2007-03-14T22:22:00.000+01:00

Var að lesa stjörnuspána mína inn á mbl.is og vá hvað hún er góð:

Steingeit: Þú er jafn svalur og agúrka, svo það er erfitt fyrir fólk að vita að í raun líður þér einsog súrri gúrku. Svamlaðu um í edikinu um tíma, og þurrkaðu þér svo. Þú þarft ekki að binda um nein sár sem tímann læknar ekki.

Svoldið til í þessu. Ég og Halla áttum tíma pantaðan í dag í bólusetningu nr. 2. Við fórum fyrst í september áður en við fórum til Caíró og svo áttum við að mæta aftur núna og fá aðra sprautu sem dugar í 20 ár. Síðast þegar við fórum þá sprautaði hjúkkan okkur í lærið þannig að ég vaknaði upp við vondan draum í skólanum í dag því ég var í svo hræðilega ljótum nærbuxum. Mátti nú alls ekki láta sjá mig í þeim hjá hjúkkunni þannig að ég hjólaði á fullu heim til að skipta yfir í aðeins meira "fancy" buxur. Svo fór ég niðrí bæ og hitti Höllu fyrir utan og við fórum saman inn og hjúkkan biður okkur vinsamlegast að fara úr peysunni...djöhhh... ég sem var búin að hafa svo mikið fyrir því að skipta og svona. Við fórum nú bara að hlæja af þessu því það hefði verið svo týpískt að ég hefði bara rifið mig úr þarna á staðnum og staðið á nærbuxunum áður en hjúkkan hefði náð að segja eitthvað en sem betur fer gerðist það ekki.

Seinasta föstudag kíktum við til Soffíu þar sem Bóel og Vallý voru í heimsókn. Það var nú bara frekar rólegt miðað við. Fengum okkur nokkra öl og spiluðum Leironarí, óþarfi að tala um úrslitin enda hver man hvernig þetta fór :/
Daginn eftir var leikur hjá okkur í JAI. Ég og Halla vorum báðar að keppa og vorum heldur betur á skotskónum. Við unnum leikinn 5-1 og ég skoraði 2 mörk og Halla skoraði sitt fyrsta mark fyrir JAI og það með vinstri og það var meira að segja helv...flott mark!!
Um kvöldið var svo smá afmælispartý fyrir Maren. Við hittumst við síkið þar sem opnuð var freyðivín og henni var afhent kóróna. Við fórum svo út að borða og á hljómsveitakeppnina á eftir. Það var þvílíkt stuð, bara rokkhljómsveitir að keppa. Sind, hljómsveitin sem Hlynur og Danny eru í, komst áfram þannig að næst er það Semifinal í Voxhall 26. apríl. Getið skoðað þetta inná www.emergenza.net.
Sunnudagurinn fór bara í að liggja fyrir þar sem við vorum svo þreyttar eftir leikinn. Þurftum nefninlega báðar að spila í 90 mín því við vorum bara 11 og erum ekki alveg komnar í formið fyrir það en þetta var fín æfing.

Annars er ég bara að fara að byrja á Bachelorverkefninu mínu. Er samt ekki alveg búin að velja mér efni er í smá vandræðum með þetta en ég finn mér eitthvað spennandi. Ef þið hafið einhverjar hugmyndir sem tengist arabísku eða islamskri menningu þá megiði endilega kommenta.

Helgin verður bara róleg, æfing frá 9-11 á föstudagskvöldið og svo leikur á sunnudaginn.

Góða helgi,

Ragna

Flöskudagur kominn...

2007-03-09T12:13:00.000+01:00

Vá, strax komin helgi. Þetta líður skuggalega hratt þessa dagana.

Ég fór með bekknum mínum í "hyttetur" þar sem við gistum eina nótt rétt fyrir utan Silkeborg í mjög sætum Skátaskála. Það var sumarbúðarfílingur í þessu. Þetta byrjaði allt mjög rólega, annað en ég hef vanist hérna, þ.e.a.s. það var ekki byrjað á Gammel dansk snafsi klukkan tíu. Svo um fimmleytið kom að þeim hluta sem ég var ALLS EKKI spennt fyrir.... underholdning. Okkur var skipt í nokkra hópa og allir áttu að leika sama leikritið með mismunandi útgáfum. Þetta þýddi náttúrulega bara það að ég opnaði fyrsta bjórinn. Okkar hópur þurfti að mime-a sem hentaði mér reyndar ágætlega :) En það er ótrúlegt með þessa Dani það er eins og þau fæðist með einhverja hæfileika til þess að geta leikið eins og þau fái borgað fyrir þetta. Meira að segja fólk sem segir ekki neitt allan daginn svo allt í einu á að fara að leika og það er bara ekkert mál. Þetta var reyndar mjög fyndið t.d. var eitt leikritið með ballet og óperuþema og það virtist ekki vera neitt vandamál fyrir leikarana að koma því til skila.

Svo var náttúrulega dansað, reyktar vatnspípur og dansað meira. Bekkurinn er mjög passleg samblanda af dönum og svo múslimum þannig að við fáum mikið að kynnast þeirra menningu sem að er frábært. Strákarnir eru rosalegir í dönsunum ég skil ekki hvernig er hægt að hreyfa sig svona. En það er alltaf stuð hjá þeim það er ekki hægt að segja annað.

Við fengum að vita í gær að það er búið að plana vikuferð til Sýrlands í haust og ég er mjög spennt fyrir henni því að mig langar í skiptinám til Sýrlandi á þriðju önn þannig að það væri snilld að kíkja á þetta fyrst.

Síðasta helgi fór svo í Íslendingadjamm en Sindri, Dilja, Hjalti, Eyrún, Árný, Unnur Jóna og Margrét voru hér í heimsókn svo að það vantaði ekki stuðið. Svo var farið á Train á laugardagskvöldið með Mareni, Silju, Margréti, Þór og þremur dönskum súkkulaðigaurum :)

Þessi helgi verður með rólegra móti enda var þetta orðið ágætt síðustu helgi. Allavega var ég komin með ógeð á laugardagsnóttinni. En við erum að keppa einn æfingaleik á morgun og svo förum við á tónleika um kvöldið eða svona hljómsveitakeppni en Danny og Hlynur eru í einni hljómsveitinni svo að við förum að styðja. Mjög spennó og verður örugglega gaman.

Ég var að setja inn fullt af nýjum myndum. Þannig að endilega kíkið á þær hér .

Góða helgi, Halla

Vorið að koma?

2007-03-01T20:17:00.000+01:00

Það er sko ekkert bara hægt að tala um veðrið á Íslandi neinei, það er sko alveg hægt að tala um það hérna líka. Í seinustu viku snjóaði svo mikið að allt hérna í Århus lamaðist algjörlega. Skólanum var aflýst á fimmtudag og föstudag og strætóarnir keyrðu ekki nema í miðbænum. En það stöðvaði samt alls ekki fólk í að fara í bæinn um helgina ef eitthvað var þá voru fleiri í bænum en venjulega. Held að allir hafi verið komnir með svo mikið ógeð af því að hanga heima að þau urðu bara að fara í bæinn. Við létum það allavega ekki stoppa okkur, skelltum okkur bara í snjóbuxur, úlpu og gönguskó og skelltum fínu skónum í töskuna :) En núna er eiginlega allur snjórinn farinn, ilhamdulillah, og ég er ekki frá því að vorið sé bara að koma.

Í gær buðum við systur Soffíu Tinnu og Steinunni í mat til okkar. Það var sem sagt arabískur forréttur og asískur aðalréttur, voða "kúltural" hjá okkur. Það heppnaðist bara allt mjög vel nema Wara 'inab rúllurnar úff...alls ekki góðar. Þrátt fyrir það áttum viðmvoða huggulega stund saman, alveg nauðsynlegt að gera svona af og til.

Halla skellti sér í "hyttetur" með bekknum sínum í dag og koma þau tilbaka á morgun. Allir nýnemar fara í svona ferð til að þjappa hópnum saman. Það verður örugglega mjög gaman hjá henni og ég er ein heima á meðan, finnst það alltaf pínu "notó" :)

Annars er helgin að sjálfsögðu fullbókuð eins og venjulega, partý, ball og nokkrir austfirðingar ætla að láta sjá sig hérna í Århus :)

Læt fylgja nokkar myndir með síðan um helgina.

Góða helgi allir,

knus Ragna

Sem sagt ekki að fara á hjóli.

Tilbúin á djammið

Halla og Soffía með smá dansatriði

Jenný og Soffía alveg með þetta á hreinu

Og það sem er nauðsynlegt í hverju Íslendingapartýi: Tópas ekkert helv... GaJol!

Grein í Morgunblaðinu

2007-02-20T09:16:00.000+01:00

Ef þið hafið áhuga á að lesa grein um okkur systur sem birtist í Morgunblaðinu í dag þá setti ég link á hana hérna: http://www.mbl.is/mm/gagnasafn/grein.html?radnr=1130671.

Kveðja Halla

Loksins....loksins..

2007-02-19T15:39:00.000+01:00

Enn ein helgin að baki og hún var sko ekki leiðinleg. Við skelltum okkur á þorrablót Íslendingafélagsins og það í fyrsta skipti en klárlega ekki síðasta og það var ekkert smá mikið stuð. Við fórum að vísu ekki á matinn en vorum mættar á slaginu 22:00 þegar húsið opnaði fyrir dansleik. Sixties spilaði og það var svo troðið á dansgólfinu að ég hef sjaldan séð annað eins. Það er náttúrulega alltaf stuð í kringum Silju, Maren, Hlyn, Eddu, Öldu, Lovísu og Helga og það var engin undantekning í þetta skiptið. Að vísu ákváðum ég og Ragna að taka með okkur Tópas pela og bjóða upp á snafs og þar sem ég þurfti að geyma pelann þá endaði það með því að ég drakk mest af þessu. Við skulum bara segja að ég ætla ekki að bjóðast til þess í næsta skipti. Reyndar fannst ekki jakkinn minn þegar ég var að fara svo að ég auglýsi hér með eftir honum. Hann hefur mikið tilfinningalegt gildi og ég sakna hans :´( Ef þið vitið eitthvað um þetta mál þá megiði endilega láta mig vita.

Á miðvikudaginn, Valentínusardaginn, borðuðum við Soffía, Jenný og Þóra saman hjá Soffíu svona til þess að halda upp á þennan yndislega dag saman (kaldhæðni dauðans). Þetta var mjög notaleg stund og hrikalega góður matur. Ég fæ vatn í munninn þegar ég hugsa um það...mmmmmm....Verðum klárlega að gera þetta oftar.

Annars gengur lífið sinn vanagang með skóla og fótbolta. Arabíska deildin verður með smá "hyttetur" í næstu viku svona til að þjappa hópnum saman. Þetta er fyrir alla arabísku deildina þannig að þarna verða samankomnir þrír árgangar. Gaman að því.

Ég og Ragna erum búnar að fá okkur myspace síður svo að endilega add-ið okkur. Ég setti link á þær hérna til hliðar.

Knus og kram, Halla

Nýjar myndir

2007-02-09T12:56:00.000+01:00

Vorum að setja inn myndir frá Hawaii partýinu síðustu helgi. Þetta var svaka stuð og ef þið viljið lesa meira um það þá eru góðar lýsingar af partýinu inn á síðunni hennar Marenar og líka fullt af myndum og hjá Ísdrottningunum.

Jább, við erum þroskaðar systur.

Góða helgi allir saman

Og så er vi hjem igen!

2007-02-07T21:54:00.000+01:00

Þá erum við loksins komnar til Århus aftur eftir rúmlega 4. mánaða flakk. Það má nú eiginlega segja að þetta sé það sem við erum farnar að kalla heima sú var allavega tilfinningin þegar við stigum inn í íbúðina okkur síðasta fimmtudagskvöld.

Strákarnir sem voru að framleigja íbúðina okkar (með öllu dótinu okkar því við gátum náttúrulega ekki geymt það neins staðar) skildu allt voðalega vel eftir sig, allt var mjög hreint og fínt og þeir meira að segja skildu eftir blómvönd og rauðvín handa okkur! Algjörar dúllur :)

Föstudagurinn eftir komuna til Århus fór í að bera upp alla kassana sem við höfðum farið með niðrí skúrinn okkar á meðan við vorum í burtu, föt, myndir og fleira. Síðan opnuðum við rauðvínsflöskuna sem strákarnir gáfu okkur og fórum niðrí bæ í heimsókn til Soffíu Tinnu og Árnýjar á Kystvejen. Kíktum aðeins með þeim á Fredagsbar i Arkitektaskólanum, kíktum smá í bæinn og hittum fleiri vini og enduðum svo á Shawarma King mmmmm..........

Á laugardaginn fórum við svo út að borða með systrunum Öldu, Brynju og Eddu vinkonum okkar hérna og Nínu frænku þeirra á veitingastaðinn Ítalíu og kíktum svo í Hawaii partý með fleiri Íslendingum. Eins og alltaf þegar Íslendingar koma saman þá er mikið drukkið, mikið fíflast og mikið hlegið. Tókum mikið af myndum þetta kvöld sem koma bráðlega á myndasíðuna okkar.

Sunnudagurinn var svo tekinn "hygge". Skólinn byrjaði hjá okkur á mánudaginn og var bara mjög fínt að byrja aftur. Við vorum báðar farnar að sakna þess mikils að hafa smá rútínu, manni finnst maður aldrei koma neinu í verk nema að hafa smá skipulag á lífinu og nóg að gera.

Fyrsta fótboltaæfingin var í gær. Undirbúningstímabilið að byrja sem er alltaf erfitt og erum við svoleiðis að þjást fyrir það í dag en það er pínu gott líka :) Danir þekkja sko ekki neitt sem heita inniæfingar og æfa alltaf úti og það er alveg sama hvernig viðrar og þar sem við erum frá Íslandi þá finnst okkur ekki við hæfi að kvarta og bítum bara á jaxlinn :/

Svo er bara nóg að gera framundan meiri skóli, fótbolti, æfingabúðir, þorrablót, Sálin og Stuðmenn, Pearl Jam og Dodo And The Dodo's :)

Við viljum óska elsku bestu stóru systur okkar til hamingju með daginn, hún er 27 ára stelpan í dag og líka til lukku með að vera búin með mastersritgerðina í sálfræði, já stelpan okkar er orðin sálfræðingur, þessi elska, vildi að við gætum verði hjá þér dúllan okkar en við erum að hugsa til þín, knús og kossar frá okkur og svo átti þessi myndarlegi frændi okkar líka afmæli þann 4. feb og fær hann hamingjuóskir frá okkur!

Nýjar myndir

2007-01-24T13:53:00.000+01:00

Vorum að setja inn myndir frá desember og janúar. Vonandi virka þessir linkar en annars getið þið alltaf smellt á myndasíðan okkar hérna vinstra megin.

Annars er allt gott að frétta. Við héldum smá erindi í Bæjarbókasafninu í Þorlákshöfn sl. fimmtudag um námið okkar, Islam og ferðina til Egyptalands. Þetta gekk rosa vel og það mættu mjög margir. Við bjuggumst ekki við því að það myndu svona margir mæta svo að við vorum mjög ánægðar með það hvað margir sýna þessu áhuga. Ragna skilaði svo arabískuritgerðinni sinni daginn eftir, Höllu til mikillar gleði en hún hafði ekki verið viðræðuhæf þangað til. Hehehe :-)

Senn líður að því að við snúum aftur til Árósa og við erum farnar að hlakka mikið til. Maður fær alltaf pínu leið á svona rútínuleysi eftir ákveðið langan tíma. Býst samt við því að við verðum komnar með ferðafiðring fljótlega. Erum líklega búnar að redda okkur vinnu í skóbúð í Árósum. Vorum að vinna á Tveimur Fiskum á föstudagskvöldið og það vildi svo skemmtilega til að þar var fólk sem eiga skóbúðir í Skandinavíu og m.a. Árósum og þeir sögðu að þeim vantaði alltaf gott starfsfólk svo að við skiptumst á e-mailum og vonandi gengur þetta.

Biðjum að heilsa í bili og sjáumst á þorrablótinu á Djúpavogi um helgina... jibbí!!!

Árið 2006

2007-01-12T02:18:00.000+01:00

Settum saman smá annál um árið 2006. Sáum að margir hafa gert þetta og það er svo gaman að lesa það.

Janúar: Halla var í Þorlákshöfn og sat sveitt við ritgerðarskrif. Ragna fór aftur til Árósa 5. janúar og tók próf. Halla fór aftur til Árósa í lok janúar og það urðu fagnaðarfundir á Rosenkrantsgade. Halla, Ragna og Sindri héldu svaðalegt rokkpartý í tilefni þess að við vorum að flytja út úr íbúðinni. Undirbúningstímabilið í fótboltanum hófst með útihlaupum og æfingum tvisvar í viku og það var sama hvernig viðraði.

Febrúar: Fluttum frá Rosenkrantsgade. Frekar blendnar tilfinningar en komumst að þeirri niðurstöðu að við ætlum aldrei að flytja í íbúð á fimmtu hæð, ekki með lyftu, og agalega þröngum stigagangi. Ragna og Halla fluttu saman í eitt herbergi í Skejby og deildu íbúð með annari stelpu. Undirbúningstímabilið komið á gott skrið.

Mars: Fengum íbúðina okkar á Herredsvej afhenta. Vorum mjög sáttar. Halla tók þá ákvörðun að halda ekki áfram í Handelshöjskolen í frönsku og evrópskum fræðum og útbjó í snatri umsókn í arabísku og íslamska menningu við Århus Universitet. Spiluðum nokkra æfingaleiki sem var mjög skemmtilegt. Vorum komnar í ágætis form eftir öll útihlaupin.

Apríl: Fórum heim í páskafríinu en það kom ekki til af góðu. Halla varð eftir á Íslandi og fór að hjálpa pabba sínum í kosningarbaráttunni. Ragna fór aftur til Árósa og hélt áfram í náminu og fótboltanum og tímabilið hófst.

frh. árið 2006

2007-01-12T01:44:00.000+01:00

Maí: Halla fór á Djúpavog til Drífu, Drafnar og Írisar og byrjaði að vinna í Við Voginn. Dröfn sótti Höllu í flug og síðan var rosalegt djamm á Egilsstöðum. Byrjaði að skipuleggja hin ýmsu djömm fyrir sumarið en lagði mest áherslu á Verslunarmannahelgina. Stefnan tekin á Þjóðhátíð.

Júní: Ragna lauk prófunum og náði öllu. Hún kom austur í lok júní og var þá búin að skipuleggja skiptinám til Beirút í Líbanon um haustið. Allt klappað og klárt.

Júlí: Fórum á Todmobile á Seyðisfirði sem var geggjað gaman. Helgina eftir var stefnan tekin á Borgarfjörð Eystri í Bræðsluna að hlusta á Belle and Sebastian og Emilíönu Torrini. Magnaðir tónleikar. Ísraelir byrjuðu að sprengja í Líbanon. Útlitið ekki gott fyrir skiptinámið hjá Rögnu.

Ágúst: Þjóðhátíð í Eyjum. Eitt af því skemmtilegasta sem við höfum upplifað. Fyrsta skipti Höllu en annað skipti Rögnu. Vorum í gleðivímu alla helgina og vikuna á eftir. Kvöddum Djúpavog með tárin í augunum en gleðin tók fljótt völd því við fórum beint til London með pabba á tónleika með Rolling Stones. Daginn eftir flugum við til Billund og vorum komnar heim til Árósa á mettíma. Mjög góð tilfinning að koma aftur. Byrjuðum strax í boltanum og kepptum nokkra leiki. Mikið djamm sumarsins og lítil hreyfing sagði til sín. Festugen hófst. Ragna hætti við að fara til Beirút eða ferðinni aflýst vegna óstöðugs ástands.

frh. árið 2006

2007-01-12T01:42:00.000+01:00

September: Addi frændi kom í heimsókn og Regína systir var hjá okkur út mánuðinn. Halla komst að því að námið hennar átti ekki að hefjast fyrr en 1. febrúar. Við tókum því ákvörðun að fara til Egyptalands í tvo mánuði og taka arabísku námskeið þar. Höfðum tvær vikur til að undirbúa allt. Tókum þó nokkur djömm þar sem við gerðum ráð fyrir þurrkatímabili næstu tvo mánuðina sem reyndist rétt. Vorum komnar til Kaíró 25. september. Stóðum þar tvær á flugvellinum og vorum ekki vissar hvað við værum búnar að koma okkur út í.

Október: Komum þegar Ramadan mánuður eða fastan var nýhafinn. Gaman að upplifa þann tíma en mjög skrítið líka. Kynntumst fullt af skemmtilegu fólki í skólanum. Fengum boð um að fara í sumarhús til egypskrar fjölskyldu sem við kynntumst. Það var sannkölluð paradís. Allt annað en Kaíró. Fórum líka í Bahria eyðimörkina og gistum undir berum himni í tvær nætur. Mögnuð lífsreynsla.

frh. árið 2006

2007-01-12T01:23:00.000+01:00

Nóvember: Mamma og Gunna komu í heimsókn. Héldum áfram í skólanum. Pabbi og Regína komu í lok mánaðarins og við vorum samferða heim. Stoppuðum eina nótt í Köben.

Desember: Komum heim á klakann. Mjög góð tilfinning en gátum samt ekki annað en hugsað hvað við hefðum lært miklu meira ef við hefðum verið einn til tvo mánuði í viðbót. Fengum vinnu á Tveim Fiskum. Fórum í viðtal hjá DV, Mogganum og Glugganum (sunnlenskt fréttablað) út af ferðinni og náminu. Fórum austur á annan í jólum. Tókum eitt djamm á Egs og fórum svo á Djúpavog og héldum ein skemmtilegustu áramót fyrr og síðar með geggjuðum dansleik.

Þökkum vinum og fjölskyldu fyrir frábært ár og vonandi verður þetta ár jafn viðburðarríkt og skemmtilegt.

p.s. þurftum að setja þetta í svona margar færslur því að netið var ekki að "höndla" þetta.

Gleðilegt nýtt ár.....

2007-01-06T17:40:00.000+01:00

...og takk kærlega fyrir allt það liðna :)

Alveg komin tími til að skrifa eitthvað smá inná þetta blogg en það verður bara stutt og laggott í þetta skiptið. Nú er ca. mánuður liðinn síðan við stöllur komum heim til Íslands. Við erum búnar að gera ýmislegt af okkur, djamma smá, vinna smá (alltof lítið samt), hanga í Kringlunni og svona. Jólin voru bara hin ágætustu. Vorum hjá mömmu á aðfangadag og hjá pabba á jóladag og fengum frábærar afmælis- og jólagjafir, held barasta allt sem við báðum um, höfum það alltof gott :) Svo tókum við skyndiákvörðun 2. í jólum og hoppuðum til Egilsstaða þar sem Soffía Tinna sótti okkur á flugvöllinn og við skelltum okkur í spilapartý hjá Valdísi og Loga. Eftir það fórum við í suddalegt partý á Sólvöllunum og svo á Hetjuna. Skemmtum okkur alveg svakalega vel á Egilsstöðum, djamm á egs klikkar ekki. Síðan fórum við niðrá Congó til Drífu og co. Þar var mikið spilað Trivial og leironarí. Gamlársdagur var æðislegur. Þvílíkt gott veður, allir úti að spóka sig, góður matur, flott brenna, frábærir flugeldar og skemmtilegast áramótaball sem við höfum farið á! Brunuðum svo í bæinn með Ævari Orra í gær. Ferðin var þvílíkt fljót að líða, við hlógum svo mikið á leiðinni. Það er ekki leiðinlegt að eiga svona skemmtilegan frænda. Planið þennan mánuðinn er að reyna að vinna svoldið meira, Ragna þarf að vísu að skrifa 2 ritgerðir fyrir 22. janúar þannig að það verður svoldið að fara að spýta í lófana. Svo kíkjum við örugglega eitthvað út á lífið og að sjálfsögðu komum við austur á hinn fagra Djúpavog á Þorrablót 27. jan.

Bless í bili, Ragna og Halla

p.s. Allir að kíkja í Gamlársblað DV, viðtal við tvær svakaskvísur. Maður má nú alveg njóta sinnar 15 mínútna frægð (eru það 30 mínútur af því að við erum tvíburar?) ;)

Ísland, fagra Ísland

2006-12-02T21:42:00.000+01:00

Þá er þessu ferðalagi okkar lokið í bili. Við lentum á Keflavíkurflugvelli í gærdag og það tók við þessi líka skemmtilegi kuldi. En við vorum smá svekktar því að það var ekki snjór en við gátum tekið gleði okkar í morgun því að þá var kominn snjór. Við lögðum af stað frá Kaíró klukkan eitt eftir miðnætti á miðvikudaginn og millilentum í Mílanó þar sem við þurftum að bíða í 7 klukkutíma. Þá héldum við áfram til Danmerkur og lentum á Kastrup um fimmleytið á fimmtudeginum. Þannig að þetta er búið að vera ansi mikið ferðalag og í morgun leið okkur dálítið skringilega enda eru þetta svolítil viðbrigði t.d. bara loftslagsbreytingarnar en við erum að koma til og erum sko alveg tilbúnar í djammið ef einhver hefur áhuga á tveimur gleðipinnum, hehehehe Settum inn fullt af myndum frá síðustu dögunum í Egyptalandi. Endilega kíkið á þær hér.

Við höfum tekið eftir því að fólk er mjög áhugasamt um það sem við vorum að gera þannig að ef einhver hefur spurningar eða langar sérstaklega að vita eitthvað um þetta þá erum við meira en tilbúnar að svara. Mælum líka með því að ef einhver er að fara í svona ferð þá er mjög gott að fá ýmsar ráðleggingar í sambandi við þetta allt saman frá einhverjum sem hefur verið þarna því þetta er svo allt annar menningarheimur en við þekkjum.

Við ætlum samt að halda áfram að blogga þó svo að við séum komnar heim. Maður sér líka hlutina í öðru ljósi þegar maður er kominn heim og búinn að melta þetta aðeins. Kannski dettur okkur eitthvað meira sniðugt í hug sem að við gleymdum að nefna.

En þangað til næst... knús og kossar

Ma´salama

Tveir dagar í heimkomu!

2006-11-29T14:36:00.000+01:00

Túristast í Caíró

2006-11-25T22:56:00.000+01:00

Það hefur sko ekki farið fram hjá okkur að það sé verið að gera upp íbúðina fyrir ofan okkur. Við mættum einum vinnumanninum í stigaganginum um daginn og hann var á táslunum! Í smíðavinnu!
Svo vorum við að labba fyrir utan bygginguna í sakleysi okkar þegar nokkrir múrsteinar hrynja niður fyrir framan okkur og á eftir fylgdi fullt af drasli. Þá henda þeir þessu bara niður útum gluggan og eru ekkert að athuga hvort það sé eitthvað fólk fyrir neðan og hefur þvotturinn okkar líka orðið fyrir barðinu á þessum hreinsunum hjá þeim. Það er svoldið margt hérna í Egyptalandi sem við skiljum ekki alveg.

Í síðustu viku var seinasti skóladagurinn hjá okkur, ilhamdulillah, ilhamdulillah!
Þó svo að það sé búið að vera voða gaman í skólanum þá vorum við líka mjög fegnar að vera búnar. Þetta er búið að vera mjög strembið enda erum við búnar að læra þvílíkt mikið á þessum tveim mánuðum.
Pabbi og Regína komu í síðustu viku og svo förum við öll saman heim til Íslands aðfaranótt fimmtudags, jibbí!
Það er stíft prógramm hjá okkur núna. Við erum búin að fara að sigla á Níl og í gær skoðuðum við pýramídana, spinx og fórum í úlfaldareiðtúr sem var reyndar ótrúlega erfitt því við systur vorum allar að drepast úr harðsperrum í dag en pabbi fann auðvitað ekki fyrir neinu.
Í dag skoðuðum við "Old Cairo", Mohammed Ali moskuna og borgarvirkið. Á morgun ætlum við svo í dagsferð til Alexandriu og skoða okkur aðeins um þar. Hlökkum til að sjá muninn á Caíró og Alexandriu tveimur stærstu borgunum í Egyptalandi. Höfum heyrt frá fólki, sem hefur verið þar, að þetta séu svo ólíkar borgir.

Það er svoldið gaman að sjá hvernig pabbi og Regína eru að upplifa allt hérna í Caíró því við erum búnar að vera hérna í svoldinn tíma og þau eru svo spennt yfir öllu og finnst allt svo merkilegt og við erum orðnar svoldið þreyttar á þessari borg, menguninni, hávaðanum, peningaplokkinu og fleiru. Kannski virkum við svoldið kaldar núna miðað við hvernig við vorum fyrst en þannig verður maður stundum líka bara að vera.
En þetta er líka búið að vera þvílíkt þolinmæðispróf fyrir okkur tvær og held ég að við höfum bara staðist prófið ágætlega.

Við hlökkum rosa mikið til að komast heim. Við erum t.d. ekkert að upplifa neina jólastemningu hérna því það eru ekki haldin jól hérna þannig að það verður svoldið skrýtið að koma heim og allt er skreytt og jólalög í útvarpinu. Og svo er spurning hvort við eigum eftir að fá sjokk yfir kuldanum því það virðast allir vera að kvarta yfir kulda heima og við erum náttúrulega ekki búnar að upplifa neitt undir 20° hita hérna. En það verður bara þvílíkur munur að geta andað að sér fersku lofti og ekki koma inn og það sé mengunarlykt af fötunum okkar!

Reynum að blogga allavega einu sinni í viðbót áður en við förum heim,

Ragna og Halla

Inshallah!

2006-11-17T19:13:00.000+01:00

Þetta er orð sem að maður heyrir ekki ósjaldan hérna enda er þetta inshallah samfélag. Inshallah þýðir í rauninni "ef Guð lofar" eða "God´s willing".

Settum inn þessa mynd af söngkonunni Umm Kulthum en hún er óneitanlega dýrkuð hérna. Flestir leigubílsstjórarnir hlusta á kassettur með henni, hækka í botn og syngja með.

Við furðum okkur stundum á því að miðað við fjölda starfsmanna á hverjum stað og ekki mikils fjölda kúnna hvað þjónustan getur gengið ótrúlega hægt. Það getur tekið allt upp í 20 mínútur að fá einn kaffibolla. Það er heldur ekki óalgengt að fjórir afgreiði mann í einu en samt fær maður ekki það sem maður pantaði en þá er maður hvort sem er búinn að bíða svo lengi að manni er nokkuð sama, étur eða drekkur hvað sem að kjafti kemur. Við erum allavega alltaf að sjá það meira hvað við Íslendingar erum með háan "standard" í öllu sem að við gerum. Við veitum yfirleitt mjög góða þjónustu og maturinn okkar er gríðarlega góður.

Í skólanum sem við erum í er fólk frá öllum löndum t.d. Ameríkanar, Spánverjar, Bretar, Frakkar o.fl. Reyndar er áberandi mikið af Ameríkönum hérna. Fólk er þarna af ýmsum ástæðum. Sumir vegna vinnunnar t.d. diplómatar hjá sendiráðum, blaðamenn, rithöfundar, nemendur og Arabar sem hafa alist upp í öðru landi og telja sig jafnvel ekki vera Araba en vilja læra tungumálið. Einn sem er með okkur í bekk í egypsku (talmálinu) heitir Josh og er rithöfundur. Hann er hérna í rannsóknarvinnu vegna bókar sem hann er að fara að skrifa. Hann hefur upplifað margt áhugavert hérna vegna rannsóknarvinnurnar.
Hann sagði okkur frá því að hann fór í heimsókn í fangelsi hérna með nokkrum öðrum aðilum. Þeir fóru með mat og fleira handa föngunum því að maturinn í fangelsinu er víst ógeðslegur og fangarnir mega elda sjálfir en þá þurfa þeir að kaupa matinn sjálfir og það getur verið mjög erfitt að redda því og örugglega dýrt fyrir þá. Áður en Josh fékk að fara inn þá var leitað á honum og skorið í allan mat til að ganga í skugga um að það væri ekki verið að smygla neinu inn. Eftir það fór hann upp í eins konar lest sem hann lýsti sem svona lítilli lest sem rúntar um í skemmtigörðum og máluð í alls konar litum sem hljómaði mjög kaldhæðnislega. Hann sagði okkur frá einum fanganum þarna sem hann talaði við og kom hingað frá Nígeríu fyrir átján árum með nokkrum vinum sínum. Einn vinur hans smyglaði heróíni inn í landið og reyndi að selja það en var tekinn. Í stað þess að að handtaka bara þann sem að reyndi að selja heróínið þá var allur vinahópurinn handtekinn og þessi tiltekni maður sem Josh talaði við fékk 25 ára dóm og er þegar búin að afplána 18 ár. Hann má fá heimsókn á tveggja vikna fresti og í næsta mánuði kemur pabbi hans að heimsækja hann í fyrsta skipti og verður hér í mánuð svo að hann getur hitt hann tvisvar.
Í fangelsinu búa þeir til alls konar hluti eins og perluveski og geta selt þá til þess að eignast smá pening.
Við þurfum klárlega að fylgjast með því þegar þessi bók hans Josh kemur út.

Við fórum niðrí bæ í gær með strák sem er með Höllu í bekk og er frá Alsír en ólst upp í Frakklandi. Hann er aðeins meira inní öllu hérna enda mjög óhræddur við að prófa allt og margir halda að hann sé Egypti sem getur verið ágætt stundum. Hann fór með okkur á stað sem að heitir Al Hurriya (frelsið). Þetta var mjög spes. Þetta var mjög stórt rými með fullt af borðum og stólum og nokkrum ísskápum. Annað var ekki. Þetta er nánast úti því að það voru ekki gluggar allstaðar og maður sá ketti rölta þarna um. Þetta er staður þar sem að maður getur upplifað mjög "lokal" stemningu. Það var frekar subbulegt þarna og mikið af fólki en mjög fáar konur. Þetta er víst ekki alltaf svona en þar sem það var föstudagur daginn eftir sem eru frídagar hérna þá voru óvenju margir. En þegar við fórum að líta í kringum okkur þá var mikið af útlendingum þarna og okkur var sagt að þarna kæmu egypsku blaðamennirnir og listafólkið að ræða málin. Þarna sér maður líka múslimana drekka sem að sumum þykir skrítið því að þeir halda að múslimar drekki ekki. Eftir einn bjór fórum við á annan stað sem heitir Stella og hann er pínulítill og þar kemur líka mikið af innfæddum og þar eru yfirleitt sömu kúnnarnir en má líka sjá Ameríkana og Japana á virkum dögum. Þar byrja yfirleitt fastakúnnarnir að syngja og það myndast skemmtileg stemning. En það er nú eiginlega ekki gert ráð fyrir kvenfólki þarna því við þurftum að fara á veitingastaðinn við hliðiná til að nota klósettið því að það var ekkert kvennaklósett á staðnum enda engan veginn pláss fyrir það.

Núna er aðeins vika eftir af skólanum og Regína og pabbi koma hingað á þriðjudagskvöldið svo að við höfum rúma viku áður en við komum heim til að "túristast" með þeim. Getum ekki farið heim án þess að kíkja á eitthvað af þessum sögufrægu stöðum.

Góða helgi!

Halla og Ragna

Sexy, sexy, sexy!

2006-11-10T18:22:00.000+01:00

Af hverju þurfa egyptar að gera allt með látum?!
Þetta er orðið svoldið pirrandi.
T.d. stendur karl niðri á götu og þarf að tala við konuna hérna uppá sjöttu hæð. Í staðinn fyrir að fara uppá sjöttu hæð og tala við hana þá öskrast þau á milli og maður heldur að eitthvað alvarlegt hafi gerst eða að þau séu að hnakkrífast en nei nei þau eru bara að spjalla.
Það er ekki skrýtið að við séum stundum smeyk við araba því við höldum alltaf að þau séu reið eða að rífast en svona tala þau bara saman.
Barnaskólinn hérna hliðiná er skrýtnasti skóli sem við vitum um því það eru alltaf frímínútur sem hlýtur líka að vera mjög gaman. Og allir hafa símann sinn stillt á LOUD. Það fer líka ekki framhjá neinum þegar einhverjir eru að gifta sig hérna því þá keyra allir í halarófu og flauta og flauta og FLAUTA!! Og það er ALLTAF verið að gifta sig hérna. Við þurfum að hafa sjónvarpið stillt á hæsta til að geta heyrt eitthvað í því, því hávaðinn frá götunni er svo mikill.
Svo veldur þetta keðjuverkun þannig að allir þurfa að tala hærra, hafa hærra í tónlistinni o.s.frv. Þannig að næst þegar við hittum ykkur ekki láta ykkur bregða ef við öskrum á ykkur :)

Í síðustu viku var verið að frumsýna mynd í bíói hérna niðri í bæ með frægri magadansmær sem heitir Dína. Hún var að sjálfsögðu viðstödd frumsýninguna og eftir myndina þá byrjuðu allir að klappa og hún stóð upp og byrjaði að dansa og það myndaðist þvílík stemning í bíósalnum nema hvað að strákarnir sem voru þarna æstust eitthvað upp við þetta og byrjuðu að reyna að snerta Dínu og endaði þetta með því að henni var fylgt út með aðstoð lífvarða hennar. Unga fólkið í bíóinu hélt áfram að dansa og strákarnir urðu enn æstari og byrjuðu að þukla á stelpunum sem endaði með því að þær urðu allar mjög skelkaðar og hlupu út úr bíóinu og út á götu og strákarnir á eftir þeim. Lögreglan þurfti að skakka leikinn og var þetta þvílikur skandall hérna í Caíró.
Í Egyptalandi eru lög um það að fólk má ekki sofa saman fyrr þau eru gift
Pör, meira að segja þau sem eru gift, mega ekki haldast í hendur eða kyssast úti á götu það er mjög illa liðið þ.e.a.s. ef þau eru egyptar annað gildir þó um útlendinga.

Kynlífsfræðsla hérna virðist ekki vera í forgangi og þau læra örugglega flest um kynlíf í gegnum sjónvarpið og internetið, sem er örugglega mjög hollt ekki satt?
Flestir halda t.d. að ameríkanar stundi alltaf kynlíf og geti alltaf sofið hjá. Flestir amerísku strákarnir hérna hafa sömu söguna að segja um viðbrögð egyptskra manna þegar þeir segjast vera frá Ameríku “aaa... America. You have sexy all the time, always have sexy, sexy, sexy, sexy” og með viðeigandi látbragði. Og eru vestrænar konur hérna álitnar mjög “easy” þannig að það er ekkert sérlega gaman fyrir tvær ljóshærðar stelpur eins og okkur að labba um göturnar hérna það er yfirleitt alltaf verið að kalla á okkur og svona þó svo að þetta sé alveg meinlaust þá er þetta samt mjög pirrandi. Sum svæði eru þó betri en önnur og reynum við því bara að hanga þar. Þetta er samt ágætt fyrir okkur því þetta gerir mann bara sterkari og geðillari hehe... neinei.
En við þurfum reyndar að taka fram að þetta á aðallega við um fátæka fólkið sem hefur ekki fengið góða menntun og veit hreinlega ekki betur. En við erum svo sem ekkert skárri höldum að allar konur með slæðu séu kúgaðar, sem er að sjálfsögðu ekki rétt.

Annars biðjum við bara að heilsa úr hávaðanum hérna í Caíró, Ragna og Halla

Izzaykum?

2006-11-06T11:35:00.000+01:00

Þá eru mamma og Gunnhildur farnar. Þetta var nú aldeilis ævintýri hjá þeim. Þær komu s.l. laugardagskvöld og við sendum mann eftir þeim á flugvöllinn sem Zakia vinkona okkar fær oft til þess að sækja gestina sína. Þannig að þarna beið maður með skilti sem á stóð Freyja og þær vissu ekkert af því að við kæmum ekki svo að mamma hélt að það væri ferðaskrifstofa sem héti Freyja og fannst það stórmerkilegt. En það kom fljótt í ljós að þessi maður var á okkar vegum svo að hann reddaði öllu fyrir þær og þær voru komnar heim til okkar örugglega innan við klukkutíma frá því að þær lentu.

Þar sem að við vorum eða áttum að vera í skólanum þá gátum við ekki mikið verið með þeim á daginn en þær voru duglegar að fara sjálfar, sem getur verið svolítið mál, og þær fóru náttúrulega að skoða pýramídana, egypska safnið, í siglingu á Níl og Khan al Khalili sem að er hverfi með fullt af mörkuðum og m.a. kaffihúsi sem að er búið að vera opið á hverjum degi og hverri nóttu í yfir tvöhundruð ár. Þannig að þær fóru heim hlaðnar minningum og minjagripum frá Egyptalandi.

Þegar maður fer til Egyptalands þá þarf maður að fá sér vegabréfsáritun til þess að komast inn í landið. Þetta gildir yfirleitt í mánuð nema maður hafi reddað því áður en maður kom eins og margir gera. Eftir þennan mánuð þarf að framlengja vegabréfsáritunina í ráðhúsinu hérna sem er niðrí bæ svo að það sé hægt að komast aftur úr landinu. Þetta þurftum við náttúrulega að gera og við vorum búnar að heyra að þetta væri algjört helvíti svo að þetta var ekki beint tilhlökkunarefni. Þetta virkar þannig að það eru fimmtíu básar og þarna er troðið af fólki frá öllum þjóðum og heilu fjölskyldurnar oft. Sumir að fá vegabréfsáritun og aðrir að fá landvistarleyfi eða sækja um hæli sem flóttamenn o.s.frv. Enginn fer í röð þannig að það þarf einfaldlega að troðast. Þegar loks röðin er komin að manni sjálfum þá er manni bent á að fara á annan bás og ef maður spyr spurninga þá er erfitt að fá svör og sumir sem vinna þarna tala ekki ensku. En í þetta skipti þá var gott að skera sig úr og þetta gekk ótrúlega vel miðað við það sem að við höfðum heyrt. Svo að nú erum við komnar með vegabréfsáritun fyrir næstu 6 mánuði. Ef að þetta hefði ekki gengið vel þá má alltaf reyna að borga aðeins meira og sjá hvað gerist. Það virðist allavega vera mjög algengt hérna. Frekar spillt allt saman. Næst þegar við eigum erindi hjá Sýslumanninum í Reykjavík og hlutirnir eru ekki ganga hratt þá reynir maður kannski að renna 500 kalli að afgreiðslumanninum og sjá hvað gerist. Mjög líklega verður það ekki vel liðið.

Það er mjög gaman að upplifa lífið eftir Ramadan þar sem við komum hingað þegar Ramadan var byrjaður og vissum í raun ekkert hvernig venjulegt líf í Cairó væri. Við vorum alltaf einar inná kaffihúsum og veitingastöðum að degi til. Núna er allt komið í eðlilegt form aftur. Það er samt pínu skrítið á sjá fólk borðandi og drekkandi að degi til sérstaklega kennarana en það er líka mjög fínt því þá getur maður hætt að hafa samviskubit yfir að borða og drekka fyrir framan þau. Þegar Ramadan var þá var “rush hour” um 4 leytið á daginn því allir voru að drífa sig heim fyrir Iftar og svo aftur um 11-12 leytið á kvöldin en núna er “rush hour” allan daginn sem er mjög pirrandi.
Allt í einu fórum við líka að taka eftir verslunum sem selja áfengi, ilhamdulala. Þessar verslanir heita Drinkies og eru eins ÁTVR heima nema að þær eru mjög litlar og selja 4 tegundir af bjór og nokkrar tegundir af léttvíni og vodka. Mjög fyndið miðað 20 milljóna manna borg.

Fórum í fyrsta skiptið á djammið á föstudaginn. Það var partý hjá Kevin sem að er í sama bekk og Halla. Hann býr með tveimur þjóðverjum og einum ameríkana. Þarna voru aðallega þjóðverjar og þetta var bara fínasta partý. Eftir partýið fórum ég, Ragna, Luke (er með Rögnu í bekk), Darren (er með Höllu í bekk og býr með Luke) og Martin (frá Argentínu og er með Rögnu í bekk) á stað niðrí bæ og fengu okkur nokkra bjóra og sáum sólina koma upp. Mjög skrítið að sjá Cairo á þessum tíma dags því að það var allt svo rólegt og notalegt. Mjög mikil andstæða miðað við daglegt líf hérna.

Settum inn myndir sem mamma tók þegar hún var hérna og nokkrar myndir frá djamminu á föstudaginn.

Knús, Halla og Ragna

Kullu sana wa inti tayiba

2006-10-28T23:45:00.000+02:00

Þá erum við komnar aftur til Cairó. Vorum hjá vinafjölskyldu okkar á Norðurströnd Egyptalands þar sem þau eiga jörð við Miðjarðarhafið. Þetta var algjör paradís. Þau eiga einkaströnd þannig að við gátum alveg notið sólarinnar og hafsins án þess að neinn væri að bögga okkur. Þetta var allavega frábær leið til að hlaða batteríin fyrir næsta mánuð.
Við kynntumst þeim í gegnum Souzane (bekkjarsystir Rögnu í Danmörku og hún er líka hérna að læra) og þau vildu endilega bjóða okkur þremur með. Við ætluðum nefninlega til Sharm el-sheik en þeim leist nú ekkert á það þar sem allir myndu flykkjast þangað núna því það er frí hjá öllum í þessari viku og erum við líka mjög fegnar að við fórum með þeim í staðinn.
Ströndin þeirra er sú hreinasta og flottasta sem við höfum séð. Þetta er svona týpist dæmi um strönd sem þú sérð í ferðabæklingunum en það er í raun aldrei þannig.
Öll vikan var bara endalaust "hygge", spilað, borðað góðan mat og að sjálfsögðu reynt að næla sér í einhverja smá brúnku því það er ekki hægt hérna í Cairó.

Á morgun byrjar svo skólinn aftur. Svo kom elsku mamma okkar og vinkona hennar hingað í gær og verðum við að reyna að hafa ofan af fyrir þeim í þessari viku.

Við erum búnar að setja inn nýjar myndir endilega kíkið á þær og ekki vera feimin við að kommenta.

Knús og kossar Ragna og Halla

p.s. Guðrún Elín til hamingju með nafnið, rúsína

It´s a jungle out there!

2006-10-20T20:20:00.000+02:00

Smá munur á þessum stöðum. Það búa 19.999.500 fleiri í Cairo en á Djúpavogi. Við búum þarna í 3. byggingunni til hægri í vinstra horninu, þar sem þvotturinn hangir úti á svölum :) Við erum að veifa! Sjáiði okkur? Sá sem verður fyrstur að finna okkur hefur unnið sér inn ferð til Egyptalands, aðra leið og frí gisting í eyðimörkinni.....

Egyptar elska hávaða. Hvar sem þú ferð inn í búð, á kaffihús eða veitingahús er tónlistin í botni og í umferðinni eru allir að öskra á alla en samt eru þeir eiginlega bara að spjalla. Allt hérna tekur 1 mínútu segja þeir (sem er að sjálfsögðu alltaf miklu meira en 1 mínúta) t.d. um daginn þegar við vorum að taka leigubíl, reyndar þegar Iftar var að byrja (þegar þeir mega byrja að borða aftur á daginn), þá stoppaði hann bílinn náttúrulega í eina mínútu til þess að sækja sér mat og við biðum bara sallarólegar á meðan en auðvitað tók þetta mun lengri tíma.

En nú er Ramadan að verða búin eða nánar tiltekið á mánudaginn er síðasti dagurinn, Ilhamdulillah (Guði sé lof), enda er þetta orðið ágætt. Nóg komið af detoxi og tími til kominn að sjá hvernig daglegt líf er í raun og veru. En fyrst tekur Eid við sem er viku frí frá skólum og vinnu og þá fara flestir (sem hafa efni á því) út úr borginni og á Sharm el Sheikh eða aðrar ferðamannaparadísir sem liggja við Rauðahafið eða Miðjarðarhafið. Þá verður aldeilis slett úr klaufunum.

Við förum með Souzane vinkonu okkar og Egypskri vinafjölskyldu hennar til Iskandiriyya sem liggur við Miðjarðarhafið. Þau eiga víst villu þarna og einhvern hluta af ströndinni þannig að þetta hljómar alltaf mjög vel. Alls ekki slæmt fyrir Höllu og Rögnu.

Við erum búnar að vera töluvert aktívar í félagslífinu síðastliðnu þrjú kvöld sem að telst nú til tíðinda. Fyrsta kvöldið fórum við saman nokkur úr skólanum á kaffihús og það var mjög notalegt. Kynntumst fleirum m.a. einum Íra og stelpu frá Svíþjóð. Alltaf gaman að hitta aðra útlendinga því að yfirleitt eru flestir að upplifa það sama sérstaklega stelpurnar.
Á fimmtudaginn fórum við með Souzane og nokkrum vinum hennar út að borða Iftar á Níl. Eftir matinn keyrðum við í City Star (verslunarmiðstöð) sjö saman í bíl, tveir í skottinu, og ferðin tók um 40 mínútur og á leiðinni var hlustað á kassettu með Ace of Base. Frekar skondið.
Eins og við höfum áður sagt þá er umferðin hérna vangefin. Allir flautandi og öskrandi á alla. Þetta virkar þannig að þú ferð á einhverja ákveðna skrifstofu, borgar 20 gineh (300 íslenskar krónur) og færð ökuskírteini og reglurnar eru þannig að það eru engar reglur. Og það er best að halda því þannig. Enginn notar bílbelti og hefur maður séð þó nokkur Britney Spears atvik þar sem krakkinn situr í fanginu á foreldri sínu sem er að keyra. Kannski að Britney ætti að flytja hingað þá yrði hún ekki fyrir svona miklu böggi út af þessu.

Í gær fórum við með Souzane á Grand Hyatt hótelið við Níl og sátum þar með nokkrum vinum vina hennar og spiluðum Taboo, hlustuðum á Egypta syngja karokee og drukkum Sahlab (heitur mjólkurbúðingur með kókos, rúsínum eða því sem maður vill og er hrikalega gott) og reyktum Sisha (vatnspípa með ávaxtatóbaki). Fórum heim um tvöleytið en þá voru flestir að panta sér að borða og þar sem við erum ekki að fasta þá drifum við okkur heim svo við myndum ekki troða okkur út af mat því að maturinn hérna er svo góður og erfitt að standast freistingarnar.

Settum inn myndir frá liðinni viku og nokkrar myndir af íbúðinni þar sem var hoppukeppni í gangi og sést greinilega að Halla er sigurvegari en aldrei að vita nema að það verði "rematch" seinna.

Segjum þetta gott í bili, knús og kram

Fatíma og Aisha (nýju nöfnin okkar)

Ferðin í Bahria eyðimörkina

2006-10-15T18:17:00.000+02:00

We've been through the desert on a horse with no name
It felt good to be out of the rain
In the desert you can remember your name cause there aint no one for to give you no pain
La, la la, la la la...

Á fimmtudaginn ákváðum við að það væri tími til komin að taka frí frá látunum og menguninni í borginni og skella okkur á frekari vit ævintýranna í eyðimörkinni.

Við vorum 7 sem fórum, 4 ameríkanar, 1 íri og við tvær. Við vissum lítið hvernig planið væri því eins og svo margt annað hjá okkur þá var þetta skyndiákvörðun og ekki voru bílstjórarnir að deila ferðaáætluninni með okkur. Eftir langa bílferð út í óvissuna og stopp í mestu ógeðisbúllu sem að við höfum pissað í (trúið okkur það er mun verra en það sem þið eruð að ímynda ykkur) komumst við loks á leiðarenda á hótel í Bahria eyðimörkinni. Þar var okkur hent út og við tók Ahmed (já Sindri auðvitað heitir hann Ahmed hehe...) sem var leiðsögumaðurinn okkar í þessari ferð. Þar fengum við að borða og síðan var haldið út fyrir bæinn á jeppum og inn í eyðimörkina. Settar voru upp búðir og kveiktur varðeldur. Búðirnar samanstóðu af smá skjólvegg og teppum á sandinum. Svo var boðið uppá te og byrjuðu leiðsögumennirnir og bílstjórarnir að spilað á tublu (einskonar tromma), gítar og flautu og að sjálfsögðu var sungið hástöfum með og dansaður magadans. Og athugið að þetta voru bara karlmenn og við komust ekki með tærnar þar sem þeir hafa hælana í magadansinum. Frekar neyðarlegt. Fyrsta nóttin að sofa undir berum himni var frekar erfið. Við vorum uppá smá hæð og það var frekar kalt, eiginlega bara mjög kalt og þ.a.l. lítið sofið.

Daginn eftir skoðuðum við Svörtu eyðimörkina sem er reyndar ótrúlega lík íslensku hálendi fyrir utan hitann, fórum í sund og lögðum okkur undir pálmatrjám í einum af bæjunum sem hafa vaxið kringum uppsprettu í eyðimörkinni. Síðan keyrðum við í Hvítu eyðimörkina þar sem áætlað var að gista um nóttina. Okkur fannst Hvíta eyðimörkin miklu skemmtilegri og fallegri. Þar settum við upp búðir og við bættust 5 hressir spánverjar sem hafa verið vinir síðan þeir voru 5 ára og fóru í þessa ferð til að halda uppá að þeir verða allir 40 ára á árinu. Við fylgdumst með sólinni setjast og tunglinu koma upp sem var ótrúlega fallegt. Seinni nóttin var mun þægilegri en sú fyrri. Ekki eins kalt og kannski vorum við bara farnar að venjast þessum aðstæðum. Það sem kom okkur á óvart við eyðimörkina er að það er ótrúlega lítið af pöddum og dýrum. Eina sem við sáum voru bjöllur og eyðimerkurrefur.

Næsta dag var rúntað um hvítu eyðimörkina og svo keyrt tilbaka til Cairó. Það var svo gott að komast úr óreiðunni og látunum í borginni og upplifa ró og næði. Fyrsta kvöldið minnti okkur eiginlega á gömlu góðu dagana heima á Djúpavogi þegar maður lá í grasinu og fylgdist með stjörnunum og manni leið eins og maður væri einn í heiminum.

Núna erum við sem sagt komnar aftur í borgina og aðeins 1 vika eftir af námskeiði 1 og eftir það tekur við vikufrí og verðum við að fara að plana eitthvað spennandi að gera í fríinu. Kannski skellum okkur til Rauða hafsins og fá smá lit.

Biðjum að heilsa í bili, knús og kossar Ragna og Halla

P.s. settum inn myndir úr ferðinni og ýmsar myndir frá fyrstu dögunum.

Welcome to Egypt

2006-10-08T12:24:00.000+02:00

Fyrir þá sem eru að íhuga að fara í meðferð... gleymið því. Komiði bara hingað. Við gerðum okkur ekki alveg grein fyrir þessu áður en við komum en núna skiljum við af hverju mamma hvatti okkur svona mikið til þess að fara. Kannski þess vegna sem að við erum búnar að vera svona þreyttar og líða hálf skringilega... við erum bara með fráhvarfseinkenni. Reyndar er almennt drukkið hérna en í Ramadan mánuði er það alveg bannað. En það má ekki vera með áfengi út á götu eða vera fullur út á götu. Og það er strangt tekið á því ekki svona eins og heima. Múslimar mega strangt til tekið ekki drekka áfengi en sumir fara ekki eftir því, eins og gengur og gerist, þannig að þetta gæti breyst eftir Ramadan. Í stað áfengisdrykkja eru nýkreistir ávaxtasafar sem eru reyndar mjög ljúffengir.

Við erum tvisvar búnar að fara út á lífið hérna á staði sem eru báðir við Níl og til þess að komast inn þurftum við að vera á gestalista. Báðir mjög flottir staðir og mjög ólíkt því sem við sjáum á götunum. Þarna kemur fólk og borðar fram eftir öllu, af því að það er Ramadan, reykir Sisha (ávaxtatóbakspípa), spilar jafnvel og hefur gaman. Mjög skrítið að fylgjast með öllum þessum fjölda fólks vera að skemmta sér ÁN áfengis.

Ramadan er mjög heilagur mánuður og það er margt sem að fólk gerir ekki. T.d. má ekki dansa, drekka, segja eitthvað ljótt, hugsa eitthvað ljótt og fólk reynir að vera ekki með neitt bögg við hvort annað.

Okkur finnst frekar erfitt að venjast áreitinu hérna því að við skerum okkur svolítið úr með ljóst hörund og ljóst hár og þar sem við búum er ekki mikið af ferðafólki svo að það er sífellt verið að flauta og kalla á okkur. Flestir eru meinlausir en auðvitað er fólk hérna sem er ekki meinlaust eins og alls staðar. Þeir eru reyndar mjög forvitnir og spyrja oft persónulegra spurninga eins og ertu gift eða ertu múslimi og það er mjög eðlilegt. Best er að segjast vera giftur eða í sambandi. Þeir spurja líka alltaf hvaðan við erum og hvað við heitum því að hérna þýða nöfnin þeirra alltaf eitthvað. Við segjum alltaf þeir því að það er svo miklu meira af karlmönnum alls staðar og því tókum við strax eftir. Það eru yfirleitt bara karlar að vinna á kassa í búðum, í kvenfatabúðum, á veitingastöðum og kaffihúsum. Alls staðar sem maður fer heyrir maður welcome...welcome to Egypt... Þetta virðist vera það eina sem þeir kunna í ensku en annars tala þeir mjög litla ensku.

Það er mjög fyndið að horfa á sjónvarpið hérna þ.e.a.s. auglýsingarnar. T.d. er sms leikur í gangi þar sem þú getur unnið 1/4 kíló af gulli. Vitum ekki alveg hvernig það væri að dröslast með það heim. Getur maður t.d. borgað með gulli einhvers staðar? Svo vorum við að skipta um stöð og fórum inná stöð sem heitir Kuwait sport og þar var Kameldýrahlaup í fullum gangi. Lýsingarnar voru eins og frá hestamannamóti heima þ.e. "þetta kameldýr xxx er í eigu Ahmed Sayed sem býr í Oman". Við vorum mjög spenntar yfir þessu. Svo eru arabísku fóstbræður sem er jafn fyndið og það hljómar.

Eftir að Ramadan er búin, sem má nú alveg fara að gerast, þá er plönuð þriggja daga ferð í eyðimörkina þar sem verður sofið undir berum himni og þetta er víst besti tíminn til að fara því að þá er haustið að byrja og eyðimörkin er fallegust á þessum tíma. Ástæðan fyrir því að sofa undir berum himni er til þess að sjá stjörnurnar sem er ekki alltaf hægt því að tunglið er svo bjart. Við erum mjög spenntar yfir þessari ferð og svo ætla mamma, pabbi og Regína að koma í heimsókn svo að við höfum eitthvað til þess að hlakka til.

Biðjum að heilsa í bili

P.s. óskum Auði og Ævari innilega til hamingju með litlu krúttmundu sem fæddist 5. október sl. Við erum búnar að sjá mynd af henni og hún er æði :) Vonandi hefur litla fjölskyldan það rosa gott.

Inta magnun walla eh?

2006-10-04T17:19:00.000+02:00

Ramadan er í fullum gangi eins og kom fram í síðasta bloggi. Það er ýmislegt sem maður þarf að taka tillit til í þessum mánuði. T.d. er ekki viðeigandi að drekka eða borða fyrir framan þá sem eru að fasta á daginn sem getur stundum verið mjög erfitt því lang flestir hérna eru að fasta og þegar hitinn er yfir 30 gráður þá er mjög freistandi að grípa í vatnsflöskuna. Á daginn eru allir veitingastaðir og öll kaffihús tóm en samt sem áður 5-10 manns að vinna en það þýðir alls ekki að maður geti búist við betri og hraðari þjónustu.

Eftir klukkan 6 á daginn lifnar yfir öllu eða þegar heyrist í hátölurum, sem staðsettir eru víða um borgina og í sjónvarpinu, "Allahu Akbar" sem þýðir Guð er mikill/mestur og þá má fólk byrja að borða. Í Ramadan mánuði er mest líf á kvöldin og langt fram á nótt því fólk er að borða fram eftir öllu. Flestir sofa lítið eða bara á daginn. Þetta er svipað og þegar klukkan slær 6 á aðfangadag og við segjum að jólin séu komin. Stemningin er líka svipuð og á jólunum, seríur út um allt og veitingastaðir skreyttir. Góðmennskan ræður ríkjum. Ríka fólkið setur upp borð- og stólaraðir víða um borgina og gefa fátækum og þeim sem ekki komast heim fyrir "breakfast" mat og drykki. Þetta kalla þau "matarborð Guðs" og fólkið sem gefur matinn getur hugsað sem svo að þau fasti 1 aukadag fyrir hvern sem þau fæða og með því ávinna þau sér æðri stað á himnum þegar þar að kemur. Það eru líka margir sem standa úti á götum og gefa vegfarendum drykki, döðlur og brauð fyrir t.d. leigubílstjórana sem komast ekki heim í mat. Allir eru mjög vinalegir og ánægðir. Sumir panta líka marga matarskammta frá veitingastöðum og keyra út úr bænum og gefa fólki sem er að ferðast og hefur ekki tíma til að stoppa og njóta "breakfast".

Það er líka hefð að fórna dýrum í Ramadan mánuði og urðum við vitni að því þegar nauti var fórnað hinum megin við götuna þar sem við búum. Eina stundina var það sprelllifandi og nokkrum mínútum seinna var dýrið steindautt. Það voru margir sem söfnuðust saman til að fylgjast með þessari athöfn.

Eins og er eigum við okkur ekki mikið félagslíf. Skólinn er frá níu til hálf fjögur á daginn og yfirleitt eftir skólann erum við búnar á því út af hitanum, menguninni og strembnu prógrammi í skólanum. En planið er að gerast meðlimir í stærsta tómstundaklúbbi sem við höfum augum litið. Þetta er í raun eins og lítið þorp inni í miðri Cairo eða eins og vin í eyðimörkinni. Þarna er tækjasalir, tennisvellir, fótboltavellir, hlaupabrautir, sundlaug, veitingastaðir, kaffihús, bókasafn og margt fleira. Þarna getur maður hangið tímunum saman og fengið frið frá látunum og stressinu í borginni. Meðlimir þessa klúbbs eru ríkir egyptar, ameríkanar og evrópubúar.

Í kvöld er stefnan tekin á City Star, stærstu og flottustu verslunarmiðstöðina hér í Cairo.

Biðjum að heilsa í bili, ma´a salama!

Kaos í Cairo

2006-10-01T21:23:00.000+02:00

Kúltúrsjokk!!! Við fengum vægt kúltúrsjokk þegar við komum, eins og við mátti búast.
Það fyrsta var þegar við lentum (eftir 15 tíma ferðalag og ekki búnar að sofa í meira en sólarhring) og stóðum allt í einu einar eftir á flugvellinum, fyrir utan starfsfólk, í ókunnu landi þar sem við töluðum ekki tungumálið og uppgötvuðum að við vissum ekkert hvert við áttum að fara, hvar við áttum að gista eða hvað við hétum! En þá fengum við fyrst að kynnast því hvað Egyptar eru rosalega hjálpsamir, vinalegir og gestrisnir. En í fyrstu vorum við ekki alveg vissar hvernig við áttum að taka þessu en nú vitum við að þeir eru almennt þannig og yfirleitt vilja þeir vel. En samt snýst allt um peninga en það eru ekki háar upphæðir að okkar mati. T.d. tökum við leigubíl í skólann á morgnana og borgum ca. 60 íslenskar krónur fyrir og Big Mac máltíð á McDonalds kostar um 185 íslenskar krónur. Síðan gefur maður alltaf smá "tips".
Okkur var sem sagt reddað hótelgistingu í eina nótt og morgunmat innifalið mjög nálægt skólanum og far frá flugvellinum með leigubíl (sem tekur allt upp í klukkutíma) og allt þetta fyrir ca. 3800 íslenskar krónur.

Umferðin hér er ekkert eðlileg og það var það fyrsta sem við tókum eftir. Við lentum sem sagt á flugvellinum í Cairo á mánudagseftirmiðdegi og Ramadan (fastan) mánuður var þá nýhafinn. Það þýðir að fólk má ekki setja neitt upp í sig (t.d. vatn, mat, tyggjó, sígarettur osfrv.) frá sólarupprás til sólseturs þannig að frá klukkan ca. hálf fjögur til sex er umferðin óvenju þung, þar sem fólk er að drífa sig heim fyrir breakfast (hlé á föstunni), þannig að við sátum þarna í leigubíl á leið inn í Cairo borg og í umferðinni gildir ein regla: hver verður fyrstur? Það eru engin umferðarljós og fólk fylgir ekki línunum á veginum og smeygir sér á milli bíla eins og í amerískum hasarmyndum og allir bílar eru rispaðir á hliðum, stuðurum og oft með brotinn eða engann hliðarspegil. Og inná milli í þessari kaos kemur asni röltandi með vagn aftaní stjórnandi af einhverjum sem er að selja brauð, ávexti eða bara til þess að koma fólki á milli staða. Fólk notar bílflautuna villt og galið og kemur það í stað fyrir ljós og önnur umferðamerki. Þannig að bílflautuhljóðið glamrar í hausnum á manni fyrstu dagana meðan maður er að venjast því.

Strætómenningin er líka einstök og efumst við um að koma til með að nýta okkur hana. Þetta eru yfirleitt gamlar rútur og sendiferðabílar og við vitum ekki til þess að það séu sérstakar stoppistöðvar. Þetta er eiginlega bara hop-on og hop-off og oft hangir fólk utan á. Ef maður þarf svo að komast yfir götuna þá er bara að demba sér af stað og vona það besta. En yfirleitt keyra þeir ekki á mann.

Ef við eigum einhvern tímann eftir að þora að keyra hérna þá getum við ALLT!

Skólinn er rosalega fínn, ekki stór þannig að það hentar mjög vel. Við fengum risastóra lúxusíbúð (ca. jafn stór og Kambstún eða stærri jafnvel) og við borgum um 30000 íslenskar krónur fyrir hana og hún er með tveimur baðherbergjum, þremur svefnherbergjum, tveimur stofum, stóru eldhúsi, uppþvottavél og þvottavél. Þannig að við getum alls ekki kvartað yfir neinu þar nema einstaka kakkalökkum en það er mjög eðlilegt hérna.

Við höfum fullt meira að segja en látum þetta duga í bili. Skammtur eitt af mörgum.

Ramadan Kareem (Gleðilega föstu)

Halla og Ragna

p.s. myndirnar eru af týpískum leigubíl hérna og strætó